“Hai partíu y munches posibilidaes, y hai munchu interés por parte de les cuatro fuercies”, asegura González Riaño

Magar que’l martes punxo’l so cargu de presidente de l’Academia de la Llingua Asturiana (ALLA) a disposición del Plenariu, siendo ratificáu polos académicos, Xosé Antón González Riaño considera que “hai partíu y hai munches posibilidaes, y hai munchu interés por parte de les cuatro fuercies”. Pide a Foro que “seya un actor determinante na busca del alcuerdu y que nun desaproveche una oportunidá histórica”.

El caderalgu de la Universidá d’Uviéu entamó la so intervención énte los medios de comunicación, mui numberosos esta mañana nel llar social de la institución, cola afirmación de que “tamos agora mesmo nuna situación clara de peligru de bloquéu del procesu de reforma del Estatutu que, según la nuesa interpretación, podría impidir que l’asturianu y l’eonaviegu fueren llingües oficiales nesta llexislatura, acordies colos tiempos que se necesiten pa la ratificación per parte del Parllamentu español”. Un escenariu que, según la visión de l’ALLA, tendría “consecuencies sociales”, como “una gran frustación social y un desánimu coleutivu ensin precedentes”, amás d’una “sensación mui fonda d’inxusticia” al ser Asturies la única nel que nun se cumplé l’artículu 3.2 de la Constitución y “la perda d’una oportunidá d’afitar un polu cultural con derivaes económiques y d’autoestima coleutiva evidentes”.

A ello hai que sumar que “ganaríen los mensaxes y la estratexa de los intolerantes” y “perderíen los partíos denomaos ‘constitucionalistes’ que nun son a facer efeutiva n’Asturies la Constitución Española llueu de 40 años d’Estatutu”. Nesi puntu llamó a facer autocrítica tanto a los partíos que configuren la mayoría parllamentaria como a l’asturianismu cultural y la propia ALLA porque “los dos discursos al rodiu del consensu constitucional nel planu llingüísticu tienen problemes p’afitase definitivamente ente nós”.

Por esi motivu, anunció que “punxi’l mio cargu de presidente a disposición del determín que tomaren les académiques y los academicos. Tengo que dicir nesti sen que la mio actuación nesta dinámica de negociación foi refrendada unánimemente pol Plenu”.

Nun quixo pasar González Riaño la oportunidá de reconocer “l’esfuerzu que vienen calteniendo a los llargo del tiempu les organizaciones de llealtá llingüística, y cito equí a la Xunta pola Defensa de la Llingua Asturiana o a Iniciativa pol Asturianu; tamién al compromisu de los sindicatos de clas y los sindicatos d’enseñanza, asina como’l papel de los escritores y músicos n’asturianu, del profesoráu, los periodistes...”. Un esfuerzu que “tien que siguir agora y con más puxu”.

Les causes del bloquéu

Nel análisis fechu pola ALLA nel Plenariu del martes, les causes d’esti bloquéu actual nes negociaciones esplíquense nel “retrasu del procesu de negociación, xustificáu en parte pola pandemia, que dio oportunidá a la xabaz, continuada y mui bien orquestada campaña d’intolerancia”. En segundu llugar, González Riaño citó “los problemes metodolóxicos na negociación”, afirmando que “cuando s’aborda una reforma estatutaria hai que facelo centrándose naquello que se quier reformar del nuesu ordenamientu xurídicu autonómicu y dexar al marxe otres llexístimes aspiraciones del ideariu políticu de cada partíu”.

“Tampoco nun ayuda, anque sía una cuestión marxinal”, siguió, “la influyencia de factores esternos, por exemplu la inxerencia de la Real Academia Galega esixendo, en plena negociación del nuesu Estatutu, que’l gallegu habría ser llingua oficial n’Asturies, en toa Asturies”. “La busca permanente de la complexidá nel encaxe del eonaviegu” foi pa la institución “otru factor de desgaste nel procesu”.

Ensin querer buscar culpables, faciendo referencia otra vuelta a la necesidá d’una autocrítica xeneral, sí faló de “responsabilidaes históriques”. “Ta claro qu’hai 3 fuerces polítiques, FSA-PSOE, Podemos ya Izquierda Xunida que, magar con errores, tuvieron y tán al altor de lo que s’espera d’elles dende una perspeutiva constitucionalista pa sumar los 26 favoratibles a la oficialidá. Y hai una fuerza, Foro Asturias, que, poles causes que seyan, tovía nun llogró axuntase a esi consensu”.

L’ALLA, “dende’l respetu a la so independencia, pide a esta formación “que seya un actor determinante na busca del alcuerdu y que nun desaproveche una oportunidá histórica que, a lo meyor, tarda tiempu en repetise”.

Interés de les cuatro fuercies pola oficialidá

González Riaño, a entrugues de los periodistes, señaló que “la sensación que tenemos ye que, nel tema de la oficialidá, nestos momentos hai un gran interés por parte del partíu del Gobiernu, del PSOE, d’Izquierda Xunida, de Podemos y de Foro. De les conversaciones que nós tenemos nun se deriva nenguna rocea nesi sentíu, sinón tolo contrario. Otra cuestión ye que, efeutivamente, na negociación de la oficialidá, cada partíu emplegue la so estratexa, pero sinceramente yo nesti momentu veo un gran interés por participar na reforma del Estatutu d’Autonomía a los cuatro”.

“Tolos partíos tresmiten la idea de que pa ellos ye irrenunciable y ye un llogru la participación na reforma del Estatutu d’Autonomía pa incluyir la oficialidá, pero cada partíu tien los sos plantegamientos de negociación dende’l puntu de vista estratéxico p’aprovechar esa circunstancia pa, a lo meyor, tener otros llogros, y tolos partíos faen renuncies y propuestes”, esplicó darréu. Sobre la fiscalidá, esixencia de Foro que bloquia les negociaciones, el presidente de la institución apuntó que “ye posible que tenga más valir simbólicu que práuticu porque, dende llueu, hai un proyeutu a nivel estatal d’harmonización fiscal y esta esmolición va desapaecer en cuantes haya una norma suprautonómica en rellación a esta cuestión”.

Entrugáu por qué l’ALLA fai esi llamamientu en concreto a Foro, González Riaño apuntó que, “sabiendo qu’ellos tán d’alcuerdu cola oficialidá”, consideren, siempre dende una postura respetuosa insistió, que “tienen que facer un esfuerzu de busca de xuntura y d’alcuerdu coles otres trés fuercies polítiques”. “Nesti momentu, cuando los plazos van pasando, cuando apremien, cuando hai peligru de bloquéu, ye cuando más interés van poner y más iniciatives van surdir, y tán surdiendo, de los partíos, xustamente porque llegamos a una situación na que la cuestión cuerre peligru y nengún de los cuatro partíos quier qu’esi llogru constitucional nun sía efeutivu pola so posición”, añadió poniendo una nota d’optimismu.

“Hai partíu y hai munches posibilidaes, y hai munchu interés por parte de les cuatro fuercies polítiques”, incidió nesi momentu’l presidente de la institución.

Actuación nel casu de que nun avance la situación

Previamente a estes preguntes, na parte final de la esposición del análisis fechu’l martes pola ALLA’l, González Riaño apuntó que, en casu de que’l bloquéu se caltenga y la reforma sía fallida, va “esixir, con más puxu y argumentos, el cumplimientu de la previsión constitucional del artículu 3.2 como un derechu irrenunciable d’Asturies. Ye dafechu incomprensible dende una perspeutiva democrática la invitación permanente que se fai por algunos sectores del cumplimientu de la Constitución; increyible y inconcebible dende’l puntu de vista democráticu”.

“En segundu llugar habría qu’afondar na reivindicación cívica”, teniendo en cuenta “trés aspeutos básicos: la unidá, la tresversalidá y l’enanchamientu de la base social de la demanda d’oficialidá”. “Hai qu’afondar na realidá de que la llingua asturiana tien un calter tresversal, ye dicir, dende’l puntu de vista ideolóxicu nun pertenez nin a les dereches nin a les izquierdes n’esclusiva, sinón que ye una construcción histórica del pueblu asturianu”, llamando a buscar l’averamientu del PP nel consensu, un partíu que, confía, participe na negociación de la futura llei que desendoque la oficialidá.

Por último reclamó una “posición más activa, y con más protagonismu, a sindicatos, asociaciones culturales y deportives, l’ámbitu empresarial, los movimientos ciudadanos, etc”. “L’Academia considera qu’hai qu’apurar toles opciones de negociación porque tiempu y determín hai per parte de los partíos políticos implicaos. Hai tiempu y determín”.