Asturies recibiría 290.000 de los 1,6 millones a autonomíes billingües pa la promoción de los idiomes del Estáu

Los responsables de Política Llingüística de les ochos comunidaes autonómes incluyíes na enmienda a los Presupuestos Xenerales del Estáu aprobada pol Senáu y ratificada pol Congresu pautaron un repartu asimétricu de los 1,6 millones alcordaos. D’esta forma búscase beneficiar a Asturies y Aragón, les que nun cuenten con oficialidá de les sos llingües, más febles, con 120.000 euros más qu'al restu.

El día 11 tuvo llugar un aconceyamientu telemáticu nel que se punxeron les bases a esti alcuerdu, que Carles Mulet, senador de Compromís que tramitó la enmienda de la Chunta Aragonesista que contó col sofitu del PP, yá fixo llegar a Miquel Iceta, ministru de Cultura y Deporte. Amás de dichu repartu asimétricu pol qu’Asturies y Aragón reciben 290.000 euros y Galicia, Euskadi, Navarra, Catalunya, Comunitat Valenciana y Illes Baleres 170.000, pautóse destinar les perres “a aiciones de Promoción y Difusión tanto de les llingües propies, como del plurillingüismu, asina como aquelles qu’ameyoren el conocimientu de la diversidá llingüística y cultural que puedan llegar, na midida de lo posible, a toles persones del Estáu”.

Nel documentu robláu soliciten que’l repartu se tresfiera a les autonomíes “a la mayor brevedá posible” y xustifícase’l repartu asimétricu na “solidaridá interterritorial coles llingües más necesitaes”. Tamién se-y pide al Estáu “campañes de sensibilización a nivel xeneral pa que’l plurillingüismu y la diversidá cultural sían vistos por toles persones de toles comunidaes autonómes, de manera especial aquelles que nun cuenten con llingües cooficiales, como una riqueza a respetar y preservar”.

Por último, solicítase que nel PERTE del ámbitu de dixitalización y intelixencia artificial s’incorporen “toles llingües del Estáu, sían o non cooficiales”.

Cumplimientu de la Carta Europea

Mulet calificó de “histórico” que per vez primera se incorpore nos Presupuestos Xenerales del Estáu la implicación pa los idiomes protexíos pola Carta Europea de les Llingües Rexonales o Minoritaries, ratificada pol Estáu nel 2001. Agradez d’igual forma l’interés amosáu por Iceta y espera que “tenga receptividá a esta propuesta en positivo y tenga sensibilidá con aquelles comunidaes autónomes que nun tienen entovía órganos de política llingüística, como la Rexón Lleonesa, Extremadura o Cantabria”.

Na semeya, Mulet y Iceta.