La xunta de negociación de la reforma estatutaria podría aplazase a la selmana qu'entra

Dolores Carcedo, vocera socialista, valoró esti cambiu na convocatoria d'un aconceyamientu nel que va analizase la respuesta de la izquierda a les demandes fiscales de Foro.

Magar que'l compromisu tomáu polos partíos negociantes el vienres yera celebrar un aconceyamientu selmanal pa entainar col procesu de reforma del Estatutu d'Autonomía énte los curtios plazos esistentes, col 1 de febreru como fecha llende marcada por IX pa llegar a un alcuerdu, esta selmana podría nun celebrase la xunta prevista "por compromisos d'otros grupos parllamentarios", apuntó Rafael Palacios, diputáu de Podemos, nun momentu nel que les formaciones tán centrando les sos posiciones énte les diferentes esixencies presentaes. "Ta pendiente de fixar, posiblemente al entamu de la selmana qu'entra", apuntó esta mañana Carcedo, qu'anunció que nel alcuentru "analizaráse esa propuesta d'artículu 4 ente toles propuestes qu'hai enriba la mesa y tamién Foro Asturias treslladará la so posición sobre los documentos que se plantegaron, si permiten siguir avanzando na negociación".

IX confirmó una propuesta de desbloquéu nel que respuenda, ún a ún, les doce demandes de Foro, adelantando qu'acepta'l 75 por cientu de les mesmes. Podemos, pela so parte, comprometióse tamién a analizales pa tratar de "superar esta situación de bloquéu” pa que s’apruebe la norma “los más pronto posible".

Les diferencies tán nel tema fiscal. La formación d'Adrián Pumares propón "acometer una reforma fiscal qu'alivie la presión sobre empreses y families" nel que rescamplen la elevación "del límite exentu de tributación nel impuestu de socesiones y donaciones, de los 300.000 euros actuales a 1.000.000 por herederu y donatariu, nos grupos de parentescu I y II" y una rebaxa "en mediu puntu porcentual" de los cuatro primeros tramos autonómicos sobre l'IRPF que nun convencen nin a IX nin a Podemos.

Semeya obra d'Armando Álvarez.