El preciu máximu de los test d'antíxenos queda afitáu en 2,94 euros

Entama la vacunación de la tercer dosis n'Asturies a persones de 30 a 39 años. El miércoles superáronse per segunda xornada los 3.000 contaxos, nuna xornada ensin finaos.

La Comisión Interministerial de Precios de los Medicamentos, órganu competente pa la fixación de los precios de los medicamentos que se financien nel Sistema Nacional de Salud, decidió esta mañana'l costu máximu de los test d'antíxenos. Ésti queda afitáu en 2,94 euros dende'l sábadu.

"L'oxetivu principal marcó un preciu lo más asequible posible, calteniendo siempre l'equilibriu pa que'l productu tea disponible na canal farmacéutica", esplicó la ministra de Sanidá, Carolina Darias, que preside la comisión. Nella participen un miembru de toles comunidaes autónomes y de los ministerios de Facienda y Función Pública, d'Asuntos Económicos y Tresformación Dixital, y d'Industria, Comerciu y Turismu, y la decisión tomóse por unanimidá.

Baxa la hospitalización

La Conseyería de Salú comunicó la detección ayeri de 3.190 casos nuevos de COVID-19 depués de los 3.605 del día anterior, récor del andanciu. Ye la segunda vegada na que se superen los trés millares de contaxos nuna xornada.

Sicasí, baxó la hospitalización, al pasar de 438 a 426. En planta hai 369 pacientes, 11 menos que'l martes, y na UCI 57, 1 menos.

Otra nota positiva ye que nun se rexistró nenguna muerte ayeri.

Tercer y cuarta dosis

Asturies entamó güei a vacunar cola tercer dosis a les persones del tramu d'edá de 30 a 39 años, xornada na que la Comisión de Salú Pública aprobó que los mayores de 18 años vaya recibiéndola según avance la campaña. D'igual forma diose lluz verde a la cuarta dosis pa inmunodeprimíos a los cincos meses de la puesta última.

Na semeya, filera esta mañana pa vacunase nel Palaciu de Deportes de Xixón.