Esti martes superóse'l récor del andanciu en cuasi un millar de casos

Rexistráronse 3.605 contaxos na xornada.

El vienres Asturies vivía'l día con más positivos detectaos de la quinta fola y de tol andanciu con 2.759 casos de COVID-19, una cantidá muncho mayor que'l récor del restu de les foles, que se dio na segunda, en payares del 2020, con 808. Lloñe de parar, ayeri l'ascensu de contaxos disparábase hasta los 3.605, esto ye, 846 más que'l techu hasta agora.

No que respeuta a les hospitalizaciones, siguen medrando de manera moderada. Ayeri zarróse con 438 ingresaos, 7 más que'l día anterior que se dan en planta, onde hai 380 persones, poles 58 de la UCI.

Na xornada hai que llamentar la muerte d'una muyer de 90 años. Ye la perda númberu 2.204 cola enfermedá causada pol coronavirus SARS-CoV-2.

Na semeya, filera esta tarde nel puntu de vacunación de Xixón, nel Palaciu de Deportes.