Entra a valir la esixencia de mididores de CO2 n'hostelería y ximnasios

Nun va haber multes la primer selmana si se xustifica'l trámite de merca. Esti xueves rexistráronse 391 casos nuevos de COVID-19.

El Conseyu de Gobiernu d'esta tarde dio'l preste a la recomendación de la Conseyería de Salú d'esixir la instalación de mididores de CO2 en tolos establecimientos d'hostelería, discoteques, negocios d'ociu nocherniegu, llocales de xuegu y apuestes, y ximnasios. Va a entrar a valir esta mesma medianueche.

Los propietarios han asitiar los sistemes de midición nun llugar visible pa los veceros y vixilar que la concentración de CO2 nun pase en nengún momentu les 800 partícules por millón (ppm), auque se recomienda caltener siempre los niveles perbaxo de les 700 ppm. Si se superara la llende, sería necesario reforciar la ventilación natural o forzada del llocal.

Anque s'esixe dende esta nueche, va haber un plazu d'una selmana pa la merca de los mididores. Asina, nun se va multar si se demuestra que ta en trámite de facese con estos sistemes, esto ye, el dueñu del llocal espera l'unvíu del productu.

Trés finaos

La Conseyería de Salú comunicó la detección de 391 positivos ayeri. Son 57 menos que'l día anterior, cuando s'informó de 448.

Na xornada hebo que llamentar la muerte de trés homes de 91, 68 y 60 años. No que va d'andanciu'l total de finaos asciende a 2.110.

El númberu d'hospitalizaos xube de 150 a 162. D'ellos 135 tán en planta y 27 na UCI, 8 y 4 más de manera respeutiva.

51 biltos activos

Na selmana del 29 de payares al 5 d'avientu comunicáronse 27 biltos nuevos, polo que nesi momentu había 51 focos activos con un total de 485 casos. Son 23 brotos más que la selmana anterior.