Salú esixe mididores de CO2 n'hostelería y ximnasios dende la selmana próxima

|
Concepción Saavedra, Rafael Cofiño y Miguel Prieto mididores de CO2

Van aumentar tamién les inspeiciones a llocales. Detectáronse 322 casos de COVID-19 esti xueves y yá hai 123 hospitalizaos.

Rafael Cofiño, direutor xeneral de Salú Pública, dio esta mañana una rueda de prensa xunto con Concepción Saavedra, direutora xerente del Serviciu de Salú del Principáu d'Asturies (SESPA) y, Miguel Prieto, xefe d'Alertes y Emerxencies COVID, pa informar de la situación epidemiolóxica nesta quinta fola. Nella avanzóse la recomendación que va treslladar la Conseyería de Salú a Conseyu de Gobiernu pa esixir "mididor de CO2 p'asegurar una bona ventilación en toos aquellos espacios d'interior públicos nos que nun se pueda caltener de forma permante la mázcara", esto ye en "hostelería y ximnasios", esplicó Prieto.

Hasta'l momentu namái taben obligaos los chigres nocherniegos, les sales de xuegu y bingu, llugares de celebraciones y espacios d'interior onde ta permitío comer. D'igual manera va encamentase "el refurciu de los sistemes d'inspeición de los llocales", nun llabor "informativu y de garantizar el cumplimientu de les midíes, y la posibilidá d'entamar procedimientos de sanciones", añadió.

Esta fin de selmana va trabayase na ellaboración d'un informe téunicu pa treslladalu al Gobiernu, qu'ha tomar la decisión definitiva, cola previsión de qu'estes midíes entren a valir la selmana próxima. En 15 díes va valorase la efeutividá de les mesmes y la evolución de la pandemia, cola posibilidá d'entamar restricciones nueves nel que casu de que les cifres empeoren.

Ensin finaos

Ayeri rexistráronse 322 positivos, la cantidá más alta dende'l 29 de xunetu, cuando se comunicaron 347. Sigue la tendencencia ascendente, al igual que les hospitalizaciones, que xuben de 119 a 123.

En planta hai ingresaes 104 persones, 3 más que'l miércoles, mentes que na UCI alcuéntrense 19, 1 más. Nun hebo que llamentar fináu nengún cola enfermedá causada pol coronavirus SARS-CoV-2 per segunda xornada siguida.

Na semeya, Saavedra, Cofiño y Prieto.

Contador Estadistiques