Los contautos estrechos de contaxaos con ómicron han guardar cuarentena de 10 díes

El Ministeriu de Sanidá toma esti determín pa controlar l'espardimientu d'esta variante entá desconocida con presencia nel Estáu. Asturies rexistró 294 casos de COVID-19 esti martes.

Les persones que sían contautu estrechu de contaxaos con ómicron van tener que guardar una cuarentena de 10 díes, anque tean vacunaos cola dosis completa. Tamién aquellos que sían sospechosos de tar enfermos con ella, por exemplu por formar parte d'un biltu.

Hasta esti momentu detectáronse dos casos d'esta variante del coronavirus SARS-CoV-2 nel Estáu, entrambos na Comunidad de Madrid, un home y una muyer que llegaron en vuelos diferentes procedentes de la República Surafricana llueu de facer escala n'Ámsterdam. N'Asturies nun hai, de momento presencia casos con ómicron nin con sospecha d'ello.

Trés finaos

La Conseyería de Salú comunicó la detección de 294 casos de COVID-19 ayeri, polos 224 del día anterior. Ye la cantidá más alta dende'l 6 d'agostu, cuando se rexistraron 297.

Hebo que llamentar trés muertes na xornada, dos muyeres de 96 y 84 años, y un home de 91. El total de finaos cola enfermedá causada pol coronavirus SARS-CoV-2 aumenta a 2.096.

El día finó con un hospitalizáu más, polo que tán ingresaes 115 persones. D'elles, 99 persones alcuéntrense en planta, 2 más que'l llunes y 16 na UCI, 1 menos.

28 biltos activos

Na selmana del 22 al 28 de payares comunicáronse 23 biltos, polo que nesi momentu había 28 focos activos con un total de 173 casos. Son 17 brotos más que la selmana anterior.

Na semeya, aeropuertu Adolfo Suárez Madrid-Barajas, onde llegaron les dos persones contaxaes cola variante ómicron en vuelos procedentes d'Ámsterdam. Semeya propiedá d'Aena.