‘Les isles inciertes’ de Bello ye’l meyor llibru del 2020 pa la Tertulia Malory

Nun añu d’una producción lliteraria de gran calidá, ‘Les isles inciertes’ de Xuan Bello resultó escoyíu meyor llibru n’asturianu del 2020 por parte del xuráu convocáu pola Tertulia Malory. El de Paniceiros lleva asina la décima edición d’un gallardón que nunca nun repitió ganador.

Diez escritores de primer nivel, poro, algamaron el reconocimientu de la tertulia lliteraria del Pub Tom Malory de L’Entregu, activa dende l’añu 1998. L’últimu ye Bello, I Premiu Nacional de Lliteratura Asturiana y autor más reconocíu fuera de les nueses llendes, gracies a la obra ‘Les isles inciertes’ (Ediciones Trabe).

“Ye un poemariu atemporal, nel que l’autor fai un diálogu cola tradición poética universal, nun viaxe d’enorme valor artísticu onde resuenen los ecos de los grandes maestros”, rescampla’l xuráu del premiu, aconceyáu’l vienres nel pub entreguín y conformáu polos escritores Xulio Arbesú, José Luis Rendueles, Solinca Turbón, Roberto Corte, Laura Marcos, Aique Fernandi, Beatriz Quintana, David Fernán, Chechu García y Henrique G. Facuriella. El fallu diose por mayoría nesta ocasión dada la importante producción lliteraria de calidá esistente nel 2020, confirmaron los encargaos d’escoyer la obra merecedora del premiu.

‘Les isles inciertes’ ye l’octavu llibru de poemes de Bello depués de ‘Nel cuartu mariellu’ (1982); ‘Llibru de les cenices’ (1988); ‘El llibru vieyu’ (1994); ‘Los caminos secretos’ (1996); les antoloxíes billingües ‘La vida perdida’ (1999) y ‘Ambos mundos. Poesía 1988-2009’ (2010); y ‘El llibru nuevu’ (2017). La obra yá fora reconocida col XXVII Premiu Teodoro Cuesta, correspondiente al añu 2017.

“Asítiase nun tonu grave y sentimental, nel que rescampla un poeta d’ aguda sensibilidá y fondu conocedor del ser humanu, cabalmente consciente del pasu del tiempu, de la muerte y del dolor qu’esta produz y que namás l’amor ye a dilir”, espliquen dende la Tertulia Malory.

Ilustración d’Alfonso Zapico y medaya

Bello va recibir en fecha entovía por confirmar una ilustración d'Alfonso Zapico y una medaya conmemorativa como reconocimientu. La Tertulia Malory creó esti gallardón nel 2012 pa “prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n'asturianu”.

Hasta’l momentu los ganadores son Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); Ángeles Carbajal, con 'L'aire ente la rama' (2015); Francisco 'Paco' Álvarez, con 'Lluvia d'agostu' (2016); y Raquel F. Menéndez, con 'El llibru póstumu de Sherezade' (2017); David Artime, con 'Incorrectos' (2018); y Antón García, con ‘Memoria de Tuña’ (2019).

Na semeya superior, Bello nel actu académicu del XXXVIII Día de les Lletres Asturianes, onde recibió'l I Premiu Nacional de Lliteratura Asturiana.