Día del Llibru Asturianu

'Memoria de Tuña', meyor llibru pa la Tertulia Malory ente los editaos nel 2019

|
Antón García

Antón García ye l'autor d'esta obra.

El xuráu del premiu qu'entrega dende'l 2012 la Tertulia Malory pa "prestixar les lletres asturianes" y, al empar, dar difusión a les obres más destacaes, decidióse por 'Memoria de Tuña' (Saltadera) como'l meyor ente los editaos n'asturianu nel 2019. "La novela guarda una unidá tonal, l’autor ye quien a construir, a partir de la señaldá y el sentimientu, un universu simbólicu, onde con emoción controlada fai un homenaxe al pueblu, la familia, la infancia y la tradición", espresa l'acta.

Los escritores Xulio Arbesú, José Luis Rendueles, Solinca Turbón, Pablo Rodríguez Medina, Roberto Corte, Aique Fernandi, Chechu García y Henrique G. Facuriella, aconceyaos'l vienres nel pub Tom Malory de L'Entregu, foron los encargaos d'escoyer ente toles posibles la que consideren meyor obra del añu pasáu, rescamplando l'alta calidá de la producción lliteraria del 2019. Por esti motivu, el premiu tornó a fallase por mayoría.

'Memoria de Tuña' ye la cuarta novela de García, actual direutor xeneral de Política Llingüística, depués de 'El Viaxe' (1987), 'Díes de muncho' (1998) y 'Crónica de la lluz y la solombra' (2015). "Col paisaxe común de Tuña, l’autor llevanta una novela fragmentaria qu’argaya l’alma dende una prosa llimpia y contenida. L'esiliu de los familiares más allegaos del xeneral Riego en Londres, les carbonerines de rapiña, Hemingway pescando salmones, les sentíes pallabres del últimu presidente de la República o la figura de Pelayo, dánse la mano nun universu creáu en Tuña, un universu onde reposen toles esperances y emociones del ser humanu y onde se mecen los caminos, ún a ún, del mundu enteru. Ye la memoria d’un pueblu y al empar, la memoria mesma de la vida", espresen dende la tertulia qu'aconceya en L'Entregu.

La entrega del premiu va celebrase nun actu públicu en feches próximes. Nesti actu García va recibir una medaya conmemorativa y una ilustración d'Alfonso Zapico.

Dende'l 1998

La Tertulia Malory, nacida nel n'ochobre del 1998 a partir d'un grupu d'escritores que s'axuntó nos talleres lliterarios que punxo'l profesor Benigno Delmiro na biblioteca de L’Entregu col oxetivu de falar y aldericar sobre llibros y lliteratura, entreguen dende'l 2012 esti gallardón. Nestos años llevaron esti premiu Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); y Ángeles Carbajal, con 'L'aire ente la rama' (2015); Francisco 'Paco' Álvarez, con 'Lluvia d'agostu' (2016); y Raquel F. Menéndez, con 'El llibru póstumu de Sherezade' (2017); y David Artime, con 'Incorrectos'.

Contador Estadistiques