Salú torna a comunicar los datos de la COVID-19 de manera diaria

L'aumentu de casos provoca esta decisión. Esti xueves rexistráronse 77 casos nuevos.

Depués de la festividá del Pilar la Conseyería de Salú principió a dar los datos de la COVID-19 de manera selmanal. L'ameyoramientu de la pandemia y los poco positivos daben pie a ello.

Un mes depués, "énte l'incrementu de contaxos detectáu esta selmana, un fechu xeneralizáu en toles comunidaes, la información pasa a ser otra vuelta diaria". Asturies cuenta agora con una incidencia acumulada a 14 díes de 55 casos cada 100.000 habitantes y ayeri rexistró 77 positivos, una cifra asemeyada a les que se manexaben n'agostu, nel tramu final de la cuarta fola.

D'igual forma, duplicóse'l númberu de rastrexadores civiles, que güei son 36, y aumentaránse los efeutivos del Serviciu de Vixilancia de Contautos Estrechos si sigue la medría de positivos.

Xube la hospitalización

En comparanza col domingu, última xornada nel que s'actualizaron los datos, hai 9 ingresaos más al pasar de 27 a 36. En planta son 29, 10 más, y 7 na UCI, 1 menos.

Na xornada finaron amás dos homes, de 67 y 55 años, cola enfermedá causada pol coronavirus SARS-CoV-2. El domingu'l total de finaos taba en 2.084.

Les autoridaes llamen a la prudencia y encamienten a la ciudadanía a caltener les midíes de proteición, de manera especial a aquelles persones que nun tán inmunizaes, amás d'evitar espacios interiores mal ventilaos. “Torgar interaiciones n'espacios zarraos y mal ventilaos sigue siendo un elemento clave, sobre manera cola dinámica d'interaición social que tenemos nesta época del añu”, alvierte el direutor xeneral de Salú Pública, Rafael Cofiño.