ELEN celebra la so Asamblea Xeneral en Santiago de Compostela

La llei Molac francesa y l’incrementu de los conteníos audiovisuales nes diferentes llingües del Estáu son dalgunos de los temes que se van tratar na Asamblea Xeneral d’European Language Equality Network (ELEN) de Santiago de Compostela. A Mesa pola Normalización Lingüística ye l’anfitrión del aconceyamientu, nel que toma parte de forma presencial Iniciativa pol Asturianu.

Representantes d’asociaciones de reivindicación llingüística d’Euskadi, Aragón, Catalunya y Breizh, ente otros territorios, van tar presentes en Galicia pa esta cita que tien programaes alderiques, meses y resoluciones sobre los diferentes temes cruciales qu’afeuten a los miembros de la coordinadora. “Amás de la controversia sobre la nueva llei audiovisual n’España, va aldericase sobre la campaña de la Irish Language Act y la censura de la lleo Molac en Francia, ente otres cuestiones”, apunta la organización asturiana.

ELEN ta integrada por 168 organizaciones de 24 estaos europeos que representen a 47 idiomes. A Mesa pola Normalización Lingüística, cola collaboración de la Universidade de Santiago de Compostela y el Museo do Pobo Galego, entama güei y mañana l’Asamblea Xeneral, na que 35 delegaos van participar de manera presencial y el restu, telemática.

Na semeya, inauguración de l'Asamblea Xeneral nel Salón Nobre de Fonseca.