Caerdydd acueye l’Asamblea Xeneral d’ELEN, con representación d’Iniciativa pol Asturianu

Xosé B. Álvarez, vocal de Rellaciones Internacionales d’Iniciativa pol Asturianu, va representar en Cymru a la organización na Asamblea Xeneral que convoca añalmente la European Language Equality Network (ELEN). Va participar tamién nun taller sobre les campañes desendolcaes polos diferentes socios pa compartir esperiencies.

De Galicia a Cymru. Esti país del este de la islla de Gran Bretaña acueye esti añu l’Asamblea Xeneral de la ONG qu’axunta a 174 coleutivos de defensa de 50 llingües de 25 estaos europea, que se va desendolcar esta fin de selmana na capital galesa, Caerdydd.

Llywodraeth Cymru (Gobiernu de Gales) y la universidá Prifysgol Cymru Y Drindod Dewi Sant acueyen esta xunta dende mañana, cuando l’alcalde Huw Thomas va dar la bienvenida nel afamáu Y Deml Heddwch (Templu de Paz) a tolos representantes desplazaos, actu nel que tamién va haber presencia de representantes del Gobiernu y diputaos, y d’instituciones internacionales. L’Asamblea Xeneral va tener llugar el sábadu con una presentación de bones práutiques na preservación de la llingua galesa y de la so política estrella, ‘Cymraeg 2050’, col oxetivu d’algamar el millón de hablantes de galés pal 2050.

Un panel sobre comunidaes lingüístiques sostenibles con ponentes d’ONGs y del Gobierno, sobre temes qu’afeuten al galés y otres llingües minorizaes y cómo afrontalos, y otru sobre la Década Internacional de la UNESCO poles Llingües Indíxenes; una ponencia de la Comisionada Asistente de la Llingua Galesa, Gwenith Price, sobre’l so trabayu; o un alderique d’activistes pola llingua irlandesa, van ser dalgunes de les actividaes previstes. Tamién van entamase talleres d’activistes, una de les novedaes d’esti añu, nel qu’Álvarez, residente precisamente en Cymru, va tomar la pallabra.

Esta mesa va enfotase nes campañes de trabayu, llogros y árees de meyora y va contar con alderiques ente diferentes representantes de socios d’ELEN sobre enfoques pal trabayu esitosu de les organizaciones. Nesti apartáu, el vocal de Rellaciones Internacionales d’Iniciativa pol Asturianu va presentar el llabor desendolcáu pola organización a lo llargo d’estos años y va faer una esposición sobre la situación actual del idioma.

Na semeya, el Canolfan Mileniwm Cymru (Centru del Mileniu de Gales).