El Centro Asturiano de Madrid recupera’l Día de les Lletres Asturianes

El llar del Centro Asturiano de Madrid va acoyer esti sábadu la celebración del Día de les Lletres Asturianes en Madrid. En collaboración con Iniciativa pol Asturianu entama una xornada de reivindicación, defensa y promoción del asturianu que va contar con presentaciones, una mesa redonda y un recital poéticu.

El coleutivu d’emigrantes na capital del Estáu recupera asina esti festexu al rodiu l’idioma. Va principiar a les 18 hores cola presentación de ‘La Rexenta’, llibru de Leopoldo Alas ‘Clarín’ lleváu al asturianu por Víctor Suárez, que va encargase d’esplicar tolos detalles de la traducción.

A les 18.45 hores el presidente d’Iniciativa pol Asturianu, Iván Llera, va moderar una mesa redonda entitulada ‘El futuru del asturianu en xuegu. ¿Por qué ye necesaria la oficialidá?’ que va contar cola participación d’Inaciu Galán, vocal de Rellaciones Institucionales y Internacionales d’esta asociación, y Pilar Riesco, secretaria del Centro Asturiano de Madrid. Pa finar va presentase el concursu lliterariu de la entidá madrilana, que tamién se recupera, y va entamase un recital lliterariu.

Xuan Pandiella va encargase de conducir toles actividaes del Día de les Lletres Asturianes en Madrid, que se van poder siguir per Zoom en direuto al traviés d’esti enllaz.

Na semeya, un momentu de la edición de xunu del 2016, na que tamién collaboró Iniciativa pol Asturianu.