El Día de les Lletres Asturianes en Madrid finó con una semeya de sofitu a la oficialidá

|
Sofitu oficialidá Día de les Lletres Asturianes en Madrid 2021

Satisfaición ente los organizadores del eventu que tuvo llugar esti sábadu con una destacada asistencia de públicu.

El Centro Asturiano de Madrid y Iniciativa pol Asturianu recuperon el Día de les Lletres Asturianes nel llar social del coleutivu d'emigrantes. Una xornada centrada nel idioma y la so lliteratura que se desendolcó pela tarde con delles actividaes.

Víctor Suárez presentó la so traducción de 'La Rexenta', la obra de de Leopoldo Alas ‘Clarín’, nel actu qu'abrió l'eventu, pa siguir llueu con una mesa redonda de títulu ‘El futuru del asturianu en xuegu. ¿Por qué ye necesaria la oficialidá' nel que los participantes, Pilar Riesco, secretaria del Centro Asturiano de Madrid, y Inaciu Galán, vocal de Rellaciones Institucionales y Internacionales d'Iniciativa pol Asturianu, treslladaron la importancia de llograr la declaración de la oficialidá pal idioma. La organización que trabaya pola normalización de la llingua asturiana rescampla "l’entusiasmu de los y les asistentes al alderique reclamando la solución constitucional pa salvar l’idioma y llograr la igualdá de drechos n’Asturies".

Diose a conocer darréu'l Concursu de Relatu Curtiu en Llingua Asturiana a comuña ente Iniciativa pol Asturianu y el Centro Asturiano de Madrid, cola anuncia de que les bases van espublizase nunes selmanes. Una llectura de poemes remató l'actu enantes de rematalu enantes de la realización d'una semeya xunto con dalgunos de los asistentes con un pancarta de sofitu a la oficialidá.

Contador Estadistiques