Pulgar: “El 16-O tien que ser una ilusión pa tol mundu que participó per décades na reivindicación; tamos na meta final”

Amor, optimismu, pluralismu, llibertá, democracia…, son dalgunos de los ingredientes que conformen el mensaxe que va llanzar esti sábadu n'Uviéu (12 hores, Estación del Norte) la sociedá asturiana. La ciudadanía va salir a la cai esti 16-O una vegada más pa reclamar la oficialidá del asturianu y del gallego-asturiano, anque agora nun contestu mui diferente, del que falamos con Carlos Pulgar (Ḷḷena, 1975), voceru de la convocante Xunta pola Defensa de la Llingua Asturiana (XDLA).

16 d’ochobre del 2021, ¿qué ha significar esta fecha?

Tien que ser otru fitu más, como la d’abril del 2018, que significó un emburrión mui importante a la reivindicación. Foi nel marcu del ‘Proyectu 2018 pola Oficialidá’ y tol mundu coincide en qu’esa manifiestación sirvió pa que garrara aire muncha xente.

Les manifestaciones, magar que nuna época dícien que podríen ser un poco repetitives, son importantes porque sirven pa que la xenta vea les cares; veámonos na llucha depués de munches décades; y sobre manera, y lo más importante, haya xente que vaya per primera vez a una manifestación. Siempre na mani hai paisanu, un mozu o un neñu que ye la primer vez que va y depués sigue diendo a otres venti, trenta o les que faigan falta.

Y lo que tien que significar esta fecha ye otru emburrión a la reivindicación; otru tar seguru de lo que tamos defendiendo, que ye un derechu y dalgo bono pa tola sociedá asturiana dende’l puntu de vista democráticu. Y que signifique, na midida de lo posible, que sía la última d’estricta reivindicación de la oficialidá, y si depués tienen que venir otres, que sían pa pider meyores dientro d’esa oficialidá. La sociedá asturiana merez en xeneral que se supere esa etapa.

Nesta ocasión la manifestación entámase en plenes negociaciones ente los grupos parllamentarios pa la reforma del Estatutu d’Autonomía.

Sí, ye una manifestación diferente porque se ta negociando la reforma del Estatutu. Yá hebo otres negociaciones nel pasáu, pero nesta ocasión entámala’l propiu Conseyu de Gobiernu a instancies del presidente y ente los puntos principales ta la reforma d’esi artículu 4 pa que l’asturianu y el gallego-asturiano puedan ser oficiales.

Per una parte ye una reforma más de les munches que tuvo l’Estatutu, pero per otra ye una mui importante porque pue introducir la oficialidá. Entós el contestu ye meyor que nunca y la reivindicación pasa de reclamar l’apertura d’esa reforma estatutaria a que se lleve alantre nel plazu más cortu posible y de manera esitosa. Ye una manifestación menos reivindicativa, pero sí más optimista porque enantes tábemos nun estáu anterior. Tamos yá nel pasu previu a consiguir esos derechos. Por eso pidimos a tol mundu un esfuerciu suplementariu, que tampoco tien que ser un esfuerciu, sinón que tien que ser una ilusión pa tol mundu que participó per décades na reivindicación. Tamos na meta final.

Faen falta 27 diputaos p’aprobar dicha reforma. ¿Salen les cuentes?

Nós tamos convencíos, yá dende l’anterior llexisltatura, qu’hai una mayoría amplísima p’apoyalo, y por eso siempre insistimos en que lo importante yera que s’abriere la reforma y se pongan a negociar pa que llegue a bon puertu. Porque nel momentu que se vaya a votar tol mundu tien que responder, énte los sos eleutores, énte los sos programes eleutorales y énte la so conciencia, y nesi intre va vese claro esa mayoría mui amplia que va aprobar esa reforma estatutaria ensin mayores problemes, tanto equí como depués nel Congresu de los Diputaos.

Dende los sectores contrarios a la oficialidá tamos viviendo una campaña d’ataques al asturianu, hasta’l puntu de llegar al señalamientu políticu. ¿Qué opinión-y merez?

Per una parte creo que ye evidente que ye una campaña que realmente cuando ves les cares de los que realmente son, nel fondu son cuatro. Entiendo que pa los medios de comunicación resulta mui atractivo esi tipu de polémiques y dar cancha a coses que piensen que da morbu, pero depués vese que son un sector clarísimamente minoritariu de la sociedá que ta movío por intereses que naide nun conoz y que nun han suponer nengún problema pa la reforma del Estatutu.

Curiosamente, creo qu’estes campañes tamién sirvieron pa qu’una bona parte de la sociedá asturiana se diera cuenta de la realidá, porque sí qu’igual había un sector que taba a favor del asturianu pero que taba más apática o nun yera tan participativa, pero qu’agora viendo qué ye lo qu’hai en contra ta animándose más a participar y a dicir que tán a favor d’esto y de los derechos de les persones. Si nun llogramos nós esti derechu, si una minoría pue doblar el brazu a la sociedá asturiana, será un precedente mui negativo pa lo que pueda venir.

La bandera de la oficialidá amuesa un corazón multicolor frente a esi mensaxe d’odiu.

Sí, representa un mensaxe del amor, del optimismu, del pluralismu, de la llibertá, de la democracia… Non sólo pa esta manifestación. Garres toles manifestaciones pola oficialidá y siempre falamos de futuru, de derechos…, non de quita-y a naide nada. Ye un mensaxe totalmente diferente.

Lo guapo d’estes manifestaciones tan multitudinaries, y como paez que’l tiempu va acompañar un poquitín, ye que da muncha llibertá pa toles persones y toles organizaciones pa que participen de la manera que quieran. Tolos grupos, yá sían asociaciones culturales, agrupaciones de neños, entidaes deportives…, pueden participar de la manera más allegre que puedan; que lleven tou tipu de mensaxes, de pancartes, de globos…, qu’animen la participación y que tresmitan lo que ye esta manifestación: la reivindicación d’un derechu de manera optimista, positiva y democrática.