16-O: “Ye hora de pasar páxina a esa falta de derechos democráticos que tenemos n’Asturies”

|
Xune Elipe y Carlos Pulgar presentación manifestación oficialidá 16-O

Esti sábadu Asturies encara la que posiblemente sía “la última manifestación de reivindicación de la oficialidá” depués de cuatro décades de movilizaciones. “Ye hora de pasar páxina a esa falta de derechos democráticos que tenemos n’Asturies”, demanda Carlos Pulgar, voceru de la Xunta pola Defensa de la Llingua Asturiana (XDLA).

A les 12 hores va tomar salida de la Estación del Norte d’Uviéu una marea de xente pa demandar la oficialidá del asturianu y del gallego-asturiano nun momentu históricu: los grupos parllamentarios de la Xunta Xeneral alderiquen una reforma del Estatutu d’Autonomía a propuesta del Gobiernu cola reconocencia de los derechos de los falantes de les llingües propies d’Asturies como cuestión innegociable pa sacar alantre una modificación del testu. Pa ello faen falta trés quintos del Parllamentu, esto ye, 27 diputaos, una mayoría que podríen sumar la Federación Socialista Asturiana (FSA-PSOE), Podemos, Asturies pela Izquierda (IX-IAS) y Foro, organizaciones dispuestes a negociar la modificación d’una norma que cumple 40 años, col PP y Ciudadanos al marxe pola cuestión llingüística.

“El percorríu va ser el yá históricu de la reivindicación, al traviés de la cai Uría, p’acabar na plaza la Catedral, onde va haber un escenariu onde se va lleer el comunicáu a cargu de l’actriz María Cotiello y del presentador del Tiempu de la TPA, David Arango”, esplica Pulgar. Pa finar, Fruela 757 va ufrir la so propuesta musical y va dar un conciertín Rodrigo Cuevas.

“Ye una manifestación pa nós con munchu significáu en tanto que taría bien que fuera la última de reivindicación de la oficialidá. Ye hora de pasar páxina d’esa falta de derechos democráticos que tenemos n’Asturies y vayamos a un estadiu de reconocimientu de los derechos llingüísticos”, reclama’l voceru de la Xunta pola Defensa de la Llingua Asturiana (XDLA), organización que ta recibiendo “un ampliu sofitu por parte d’organizaciones sociales, sindicales, culturales, deportives, musicales, etc.”, de cara a la histórica movilización del sábadu p'amosar "l'apoyu masivu" de la sociedá asturiana "a la oficialidá".

Xunto a Pulgar tuvo presente nel actu celebráu esta mañana nel Conseyu de la Mocedá del Principáu d'Asturies Xune Elipe, en representación de Músicos pola Oficialidá. El cantante de Dixebra dio a conocer el cantar y videoclip ‘Llegó la hora/Chegóu el hora’, compuestu p’animar a la participación na cita d’Uviéu pola igualdá de derechos de los falantes d’asturianu y gallego-asturiano colos de castellanu n’Asturies.

Na semeya, Elipe y Pulgar.

Contador Estadistiques