El decretu de la toponimia oficial de Salas rexistra la forma billingüe pa la parroquia de Corniana

El BOPA d’esti miércoles espubliza’l decretu qu’oficializa la toponimia tradicional de Salas, que pasa a ser la única válida. L’espediente aprobáu recupera nomes como Ardesaldu, Camuñu, Llaniu, Ḷḷaviu, Maecina, Miera, Santolín, San Xustu, Aciana, Doriga, Santiagu la Barca, Santuyanu o Soutu los Infantes, mentes que pa la parroquia de Corniana opta pola forma billingüe ‘Corniana/Cornellana’.

El Conseyu de Gobiernu dio’l preste a esti documentu’l 17 de setiembre ellaboráu pola Xunta Asesora de Toponimia, que nel mes de marzu aprobara’l Plenu del Conceyu de Salas llueu de presentar les sos propuestes al dictame d’esti órganu. Cola espublización nel Boletín Oficial del Principáu d’Asturies (BOPA) el procesu fina, entrando a valir estos topónimos como los únicos oficiales en venti díes, el 26 d’ochobre.

Corniana ye la única parroquia pola que s’opta por una forma billingüe –la Llei d'Usu y Promoción del Bable/Asturianu recuéyela pa casos esceicionales nes que'l topónimu oficial hasta agora tenga un "usu xeneralizáu" xunto col propiu–, calteniendo’l nome ‘Cornellana’ y el tradicional Corniana: ‘Corniana/Cornellana’. Mentes, la población va denomanise Corniana.

El restu de parroquies queden tamién col tradicional, modificándose Ardesaldu, cola derogación de ‘Ardesaldo’; Boudenaya, por ‘Bodenaya’; Camuñu, por ‘Camuño’; Cermoñu, por ‘Cermoño’; Llaniu, por ‘Laneo’; Ḷḷaviu, por ‘Lavio’; Maecina, por ‘Mallecina’; Maeza, por ‘Malleza’; Miera, por ‘Millara’; Prieiru, por ‘Priero’; Santolín, por ‘San Antolín de las Dorigas’; San Esteban, por ‘San Esteban de las Dorigas’; San Xustu, por ‘San Justo de la Dorigas’; Aciana, por ‘San Vicente’; Doriga, por ‘Santa Eulalia de las Dorigas’; Santiagu la Barca, por ‘Santiago de la Barca’; Santuyanu, por ‘Santullano’; y Soutu los Infantes, por ‘Soto de los Infantes’. D’igual forma son munches les poblaciones que lu recuperen, como Samartín (‘San Martín’), Bárzana (‘Bárcena), Ouvés (‘Ovés’), L’Artosa (‘La Ortosa’), La Corriquera (La Curriquera) o Villeirín (‘Villarín’).

Amás recuéyense decenes de topónimos menores non rexistraos hasta agora, casu de Folgueirúa, El Sieḷḷu, La Llabeguera, El Meixil o El Vau.

8 conceyos pendientes

Depués de Salas, Llanera va ser el siguiente conceyu en dar el pasu d’oficializar los sos nomes de llugar tradicionales. Quedaríen asina 7 de los 78 por completar el procesu: Somiedu, Cuideiru, Ayande, Caravia, Ibias, El Valle Baḥu de Peñamellera y Navia.

Na imaxe, Corniana. Semeya obra d'Amasuela-Luis Lafuente Agudín-Jorge Rebollo baxo llicencia CC BY-SA 4.0.