El Gobiernu mira pal Estatutu de Galicia pal artículu sobre la oficialidá y insiste nel usu del términu “eo-naviego”

Yá tán en marcha les negociaciones pa la reforma del Estatutu d’Autonomía pa recoyer, ente otres coses, la oficialidá del asturianu y del gallego-asturiano. El presidente Adrián Barbón ta recibiendo a los voceros parllamentarios, presentándo-yos una propuesta que mira pa la norma gallega na redaición del artículu sobre la oficialidá y que fai usu del términu “eo-naviego” pal idioma del occidente del país.

“Tomaráse de base l’artículu correspondiente del Estatutu d’Autonomía de Galicia”, espresa’l documentu que recueye los “aspeutos esenciales de la reforma del Principáu d’Asturies”. Nel mesmu, nel so puntu siete, fala de la “declaración d’oficialidá del asturianu, con un tratamientu similar pal eo-naviego nel so esclusivu ámbitu territorial, con previsión de qu’una llei de la Xunta Xeneral del Principáu d’Asturies regule l’usu oficial y la proteición del asturianu y del eo-naviego”.

En concreto, la norma gallega afita nel so artículu quintu que “la llingua propia de Galicia ye’l gallego”. Nel puntu 2 añade que “los idiomas gallegu y castellanu son oficiales en Galicia y toos tienen el derechu de conoceros y usaros”, y nel 3 que “los poderes públicos de Galicia garantizarán l’usu normal y oficial de los dos idiomes y potenciarán la utilización del gallegu en tolos órdenes de la vida pública, cultural y informativa, y dispondrán los medios necesarios pa facilitar el so conocimientu”, finando con un cuartu qu’afita que “naidie nun podrá ser discrimináu por razón de la llingua”.

Nesta propuesta del Gobiernu rescampla la insistencia nel usu del términu “eo-naviego” en llugar del usáu hasta agora poles instituciones, gallego-asturiano. Coleutivos del occidente como Xeira vienen denunciando esta sustitución progresiva de la denominación pa la llingua d’esa fastera del país nestos meses por parte de l’Alministración, una decisión que “supón despreciar a tradición filolóxica y a denominación oficial das últimas tres décadas, ademáis de romper el consenso col movemento defensor da llingua”, manifiesta.

Xuntes con tolos grupos, menos VOX

Izquierda Xunida foi primer grupu parllamentariu esta mañana n’aconceyar con Barbón, que ta acompañáu pol vicepresidente Juan Cofiño, la vocera socialista Dolores Carcedo y la secretaria d’Organización de la Federación Socialista Asturiana (FSA-PSOE) y diputada Gimena Llamedo. Llueu foi’l turnu del PP y de Podemos, pa siguir de tarde, a les 16.30 hores, con Ciudadanos, y con Foro a les 18.30 hores, quedando fuera VOX de les entrevistes pola so posición contraria a les autonomíes.

Nos primeros alcuentros confirmóse la oposición del PP a la oficialidá y la coincidencia del Executivu y la coalición d’izquierda na necesidá de tener fechu’l testu nesti periodu de sesiones, esto ye, enantes de xunu, pa mandalu a Madrid darréu pa la so aprobación nel Congresu y nel Senáu.

Na imaxe, Barbón con María Teresa Mallada, presidenta del PP, na xunta d'esta mañana. Semeya obra d'Armando Álvarez.