Xixón va dexar de celebrar la Feria Taurina de Begoña

L’alcaldesa de Xixón, Ana González Rodríguez, anunció esti miércoles la rescisión del contratu con Circuitos Taurinos, organizadora de la Feria Taurina de Begoña, y la decisión de nun volver a sacalu a concursu. D’esta forma Xixón va dexar de tener toros depués de 133 años de corríes, con parántesis nel 1915, el periodu de la Guerra Civil y el 2020 pola pandemia de COVID-19.

Foi nuna visita a la Feria de Muestres d’Asturies (FIDMA) cuando confirmó la decisión de desaniciar la Feria Taurina de Begoña. Como argumentu, la cada vez mayor oposición a los toros na ciudá y la polémica llevantada na corrida del domingu, la tercera de la Feria, na que se sacó al ruedu a un exemplar de nome ‘Feminista’ y dos d’igual apellativu, ‘Nigeriano’, de la ganadería de Daniel Ruiz.

González Rodríguez considera esti fechu inalmisible y razón suficiente como pa nun prorrogar el contratu con Circuitos Taurinos, momentu que pretende aprovechar pa dexar d’entamar eventos taurinos en Xixón. La Feria de Begoña yera l’únicu que se celebraba n’Asturies nes décades últimes, anque esti añu ta prevista’l domingu una ‘novillada’ en Cangues d’Onís, onde nun había nengún en 40 años, tamién con un fuerte presión social en contra de la so organización.

La plaza de toros d’El Bibio, inaugurada’l 12 d’agostu del 1888 pa promover el turismu na villa, acueye tolos branos corríes de toros de manera ininterrumpida. Namái nel 1915, nel periodu de la Guerra Civil, del 1936 al 1940, y l’añu pasáu pola pandemia de COVID-19 nun s’organizó la Feria en Xixón.

Na semeya, 'paseíllo' nuna de les corríes d'esta Feria de Begoña.