Fernández: “Sentir fútbol n’asturianu foi un pasu perimportante; hai que lluchar pola retresmisión d'otros deportes”

El deporte ocupa estos díes les portaes, hores de radio y televisión, y tamién los murios de les redes sociales pola celebración de los Xuegos Olímpicos de Tokiu. Pa facilitar l’emplegu correutu n'asturianu de les diferentes disciplines el filólogu David Fernández Fernández (Candás, 1981), que yá dedicara una propuesta al fútbol, ufre ‘Terminoloxía de deportes y pruebes olímpiques’ pal proyeutu TermAst.

¿Qué-y llevó a dedicar una propuesta terminolóxica a los Xuegos Olímpicos?

La verdá ye que foi una cosa que surdió sola. Entrugé na Academia de la Llingua Asturiana (ALLA) pola posibilidá de facer esta propuesta porque pensaba que yera intereseante normativamente y al tener el preste animéme a facela. Yera un trabayu pal 2020 pero al restrasase los XX. OO. por mor del andanciu hubo qu’esperar a esti añu.

Centróse en recoyer les diferentes disciplines olímpiques y pruebes.

El trabayu entama mirando y investigando na páxina de los XX. OO. onde salen los deportes y les distintes disciplines oficiales de los xuegos de Tokyo 2020. Dempués de sacar el llistáu de pruebes y disciplines hai que facer la torna, siempres mirando a otres llingües oficiales del estáu, y pa rematar, la esplicación de les disciplines y caúna de les pruebes que tienen, que ye lo más difícil porque tien que ser una definición que la puea entender tol mundo.

¿Cuántos términos inclúi?

Pues hai al rodiu de los 250 términos más o menos.

¿Pa quién va dirixíu?

Al públicu en xeneral y al deportista en xeneral. Lo bono sedría qu’hubiere retresmisiones en llingua asturiana de los XX. OO. y los comentaristes pudieren tirar d’esos términos como material afayadizo.

Nel 2014 fixo otra propuesta, nesti casu dedicada al fútbol. ¿Tuvo aceptación ente profesionales de la comunicación y aficionaos?

Paezme qu’esta propuesta sí foi mui espardía y a la xente prestó-y enforma, y inclusive hubo representantes del Real Sporting y del Real Uviéu na presentación que, daveres, foi un fechu importante. En cuantes a los medios…, nun-y sé dicir, yo creo que sí, porque si non sedría desaprovechar un bon recursu que ta ehí, porque’l trabayu yá se fixo y namás hai que dir al TermAst p’alcontrar les pallabres que necesites.

“La xente ta preparao pa sentir y ver fútbol n’asturianu” dixo nel 2014 a esti mediu de comunicación y asina se confirmó nes diferentes retresmisiones que se fixeron en TPA nesti tiempu, y inclusive dalgún derbi en RPA.

Pues sí, la xente pue ver y sentir fútbol n’asturianu porque les más de les persones asturianes entienden la nuesa llingua. Pue chocate de mano, pero dempués ye daqué normal. La verdá ye que sentir el deporte rei n’asturianu foi un pasu perimportante; agora hai que lluchar por que tamién se puean retresmitir otros deportes, inclusive los XX. OO., y por que nun se dexe de retresmitir el fútbol y cada vegada haya más partíos n’asturianu.

¿Por qué nun se-y da continuidá nes temporaes últimes si la receición del públicu ye bona y hai profesionales pa ello?

Porque piensen qu’a la xente nun-y presta y ye mentira. Los programes n’asturianu tienen mui bona audiencia y si ye fútbol yo creo que más entá porque ye un deporte que sigue munchísima xente. Col deporte ye más fácil facer pruebes d’esti tipu, yá ves que’l fútbol salió mui bien.

Nun hai continuidá porque ven meyor echar otres coses en castellán, pero sigo diciendo, que l’asturianu tanto na TV como na radio da les meyores audiencies. Y xente, hai abondo, inclusive ufiértome pa participar nuna retresmisión, que me diba prestar a esgaya, pero nun hai forma de que me llamen (risotaes).

¿Ye’l deporte una bona ferramienta pa normalizar l’asturianu?

Creo y entiendo que sí. Cualquier situación ye bona pa la normalización y más el deporte que ye daqué que practica abonda xente. Da igual el deporte que seya, siempres que puea utilizase l’asturianu yá ye un trunfu; poro, lo qu’hai que facer ye usar l’asturianu na práctica, na retresmisión… Y colos propuestes deportives del TermAst y colos pallabreros de la oficina de Normalización del Conceyu de Xixón creo que se ta llegando a esi oxetivu.

Tornando a los Xuegos Olímpicos, ¿cómo ve les opciones de medaya de los asturianos?

La verdá ye que de los cuatro asturianos qu’hai, si cuntamos a Craviotto, la más complicada ye la de María López García (ḥoquei yerba). Pablo Carreño (tenis) ta faciendo un bon tornéu y si sigue asina pue llegar, polo menos a la llucha poles medayes. De los otros dos, Raúl Entrerríos y la xente del balonmano siempres faen bonos torneos asina qu’espero qu’algamen la medalla y Saúl Craviotto (K-4) siempres ye opción a medaya, asina que de xuru que’algamen un oru o una plata porque son una embacación mui potente.

Les de Tokiu van ser unes Olimpiaes diferentes, ensin públicu y cola COVID-19 amenazando.

El COVID tracamudiólo too, tócanos vivir unos XX. OO. con pandemia, pero lo importante ye que se tán faciendo y que’l númberu de positivos que se ta dando ye baxísimu.

¿Qué pruebes nun se va perder?

Siempres me presta ver les pruebes que nun se suelen ver normalmente. Préstame a esgaya ver esgrima, que ye un deporte guapísimu, pero tampoco voi dexar de ver les nueves como’l skate o’l surf, que son dos pruebes que s’estrenen y que tamién me presten a esgaya. Los saltos de trampolín, l’atletismu, el rugbi 7, partíos de balonmano… Nun sé, espero ver les más de les pruebes que pueda porque esto namás ye cada cuatro años.

¿Tien en mente nueves propuestes terminolóxiques venceyaes al deporte o otros campos?

Siempres se tienen en mente. Agora toi rematando un TermAst de rugbi y tamién una ampliación d’esti, el de los XX. OO., nel que quiero amestar les disciplines y pruebes d’iviernu. De xuru que se m’ocurre dalguna más y, si l’ALLA ve bien la propuesta, pues p’alantre con ella. Toi abiertu a nueves suxerencies.

¿Qué balance fai de TermAst depués de diez años y venti trabayos espublizaos?

Dempués de 10 años dende que s’asoleyare la propuesta de los términos d’economía y empresa, creo que’l balance ye mui bonu. Hai propuestes mui interesantes y que facíen falta pa normalizar dellos usos del asturianu en campos como la medicina, les matemátiques, la meteoroloxía, los términos postales… Creo que fai falta xente que s’atreva a facer propuestes de les sos disciplines, ensin mieu, porque lo que se fai con un TermAst ye normalizar la nuesa llingua en campos non estudiaos y cualquier propuesta ye bona, inclusive la del COVID y l’andanciu.