La ventena propuesta de TermAst céntrase nes disciplines olímpiques “pal so usu estos díes”

A les puertes del entamu de los Xuegos Olímpicos de Tokiu, TermAst espubliza la so ventena propuesta, centrada nos deportes y pruebes olímpiques. El so autor, David Fernández Fernández, recueye más de dos centenares de términos “pal so usu estos díes” por parte de los medios de comunicación, deportistes y aficionaos.

“Ye importante que, cada vez qu’haya un eventu d’esti tipu, haya una propuesta”, espresa’l filólogu responsable de la ‘Terminoloxía de deportes y pruebes olímpiques’ pal proyeutu TermAst qu’entama l’Academia de la Llingua Asturiana (ALLA). Millones de persones en tol planeta van poner los sos güeyos en Xapón estes selmanes y los medios de comunicación van centrar gran parte del so esfuerciu informativu en cubrir los 46 deportes qu’inclúi’l Comité Olímpicu Internacional (COI) en Tokiu 2020, trentena segundes Olimpiaes qu'arranquen el vienres.

El primer términu de la llista fecha por Fernández, autor tamién de la ‘Termionoloxía de Fútbol’, ye ‘+100 kg (yudu homes)’, que recueye como “prueba onde s'enfrenten dos lluchadores de más de 100 kg nun combate de 4 minutos. Gana'l qu'algame más puntos o'l que tire al contrariu de llombu, un ippon”. Siguen-y otres categoríes o pruebes de delles disciplines como ‘100 metros costazu’, enantes de dar con términos como ‘adoma clásica’, ‘balonmano’ ‘estilu crol’, ‘ḥoquei yerba’, ‘llanzamientu de martiellu’, ‘piragüismu agua bravo’, ‘tenis’, ‘ximnasia artística’ o ‘yudu’, toes cola so descripción y la so equivalencia en castellanu.

L’oxetivu de TermAst ye recoyer iniciatives individuales o grupales de propuestes terminolóxiques por persones en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu será l’ALLA, entamadora d’esta iniciativa xunto con Softastur y el Colexu d’Inxenieros n’Informática del Principáu d’Asturies, la que dirá inxiriéndolos dientro de los sos calces normativos.