Confírmase la baxada de casos: 278 esti llunes, con una tasa de positividá del 8,32 por cientu

Carreño, Xixón, Gozón, Llaviana, Llanes, Mieres, Uviéu, Siero y Villaviciosa, conceyos con más posibilidaes d'entrar en 4+-

A falta de la espublización de los datos oficiales de la COVID-19, la Conseyería de Salú comunicó ayeri la detección de 278 casos nuevos –l'actualización aumenta la cifra a 285 por contaxos non contabilizaos en díes anteriores–. Son 36 más que'l domingu, cuando s'informó de 242, pero confirma la baxada de casos, yá que la selmana pasada la media diaria foi de 423.

La tasa de positivá tamién baxó, rexistrándose un 8,32 por cientu al facese 3.498 pruebes de diagnósticu d'infeición activa pol 12,5 por cientu de la xornada anterior, con 2.647 tests realizaos. A 7 díes esti porcentaxe yera enantes de l'actualización del 14,09 por cientu –ayeri baxó al 13,73 por cientu–.

Finó una muyer de 67 años cola enfermedá causada pol coronavirus SARS-CoV-2, la 1.993 del andanciu –l'actualización suma una más non contabilizada hasta agora–. Mentes, hai 157 persones ingresaes con confirmación o sospecha de COVID-19, a lo qu'hai que sumar 28 que tán na UCI, 4 y 1 más que'l domingu, de manera respeutiva.

El xueves al Conseyu de Gobiernu

La Conseyería de Salú va llevar al Conseyu de Gobiernu d'esti xueves la propuesta de midíes restrictives nueves pa elevales al Tribunal Superior de Xusticia (TSXA) pa que valide'l toque de queda de 1 a 6 hores y la llende d'axuntamientos a 6 persones n'interiores y a 10 n'esteriores. La entrada del país al nivel de riesgu 2, por tar en en grau mediu d'ocupación hospitalaria dende'l domingu, lleva a la toma d'estes midíes que se sumen a la limitación del ociu nocherniegu col pieslle d'interiores hasta'l 9 d'agostu.

Los conceyos con una incidencia a 14 díes mayor de 350 casos cada 100.000 habitantes son los qu'entrarán nel nuevu nivel d'alerta 4+, nel casu de los de más de 10.000 habitantes de manera automática. Nestos momentos, y de nun camudar de manera radical l'alta tresmitibilidá en cada llugar, entraríen pa la fin de selmana en riesgu estremu Carreño, Xixón, Gozón, Llaviana, Llanes, Mieres, Uviéu, Siero y Villaviciosa, activándose asina les restricciones.

Na semeya, importante filera de coches esta mañana nel Autocovid de la Escuela Superior de Marina, en Xixón.