La variante delta yá ye la predominante n'Asturies

|
Prueba PCR COVID-19

Desplaza a l'alfa, mayoritaria nos meses últimos. Esti martes rexistráronse 352 casos, con una tasa de positividá del 12,53.

El Serviciu de Vixilancia Epidemiolóxica confirmó güei que la variante delta del coronavirus SARS-CoV-2, la nomada india, ye la predominante n'Asturies. La selmana pasada protagonizaba'l 63 por cientu de los contaxos, cuando a primeros de mes facíalo del 45.

Responsable nel so momentu d'hasta un 97 por cientu de los casos, l'alfa queda relegada pola delta, al tar agora presente nel 23 por cientu de les muestres analizaes. Mentes, la beta, la sudafricana, suma'l 3 por cientu, y la gamma, la brasileña, desanicióse nel país.

Dos finaos

A falta de la espublización de los datos oficiales de la COVID-19, la Conseyería de Salú informó ayeri de la detección de 352 casos nuevos –l'actualización rebáxalo a 343 por duplicaos en díes previos–. Son 74 más que'l llunes, cuando se comunicaron 278.

Aumenta tamién la tasa de positividá, que ye del 12,53 por cientu con 3.654 pruebes de diagnósticu d'infeición activa, pol 8,32 por cientu de la xornada anterior, cuando se fixeron 3.498. A 7 díes, esti porcentaxe yera enantes de l'actualización del 13,73 por cientu –ayeri baxó al 13,49 por cientu–.

Finaron cola enfermedá cuasada pol coronavirus SARS-CoV-2 dos homes de 93 y 85 años. Dende qu'entamó l'andanciu morrieron 1.996 persones –l'actualización aumenta esta cifra hasta 1.997–.

Hai 153 pacientes hospitalizados con confirmación o sospecha de COVID-19, a los qu'hai que sumar otres 26 que tán na UCI. Son 4 y 2 menos que'l llunes, de manera respeutiva.

 

Contador Estadistiques