El bloque oral de los esámenes B2 y C1 d’asturianu va celebrase nel centru uvieín Alfonso II

Educastur ta acabante d’espublizar la guía informativa pa los aspirantes de les pruebes de certificación de Llingua Asturiana adaptaes al Marcu Común Européu de Referencia pa les Llingües de nivel B2 y C1. L'uvieín IES Alfonso II va acoyer esti añu'l bloque oral.

Les 499 persones con plaza, 300 del nivel intermediu –quedaron fuera 131 al haber llende de matrícules–  y 199 del avanzáu, van poder consultar nesti testu tolos detalles sobres estos esámenes que van tener llugar n’ochobre: los temes, les esixencies de cada prueba, los criterios d’evaluación... Amás, esti añu la Conseyería d’Educación facilita n’otru documentu los criterios de valoración en producción y coproducción de testos escritos, producción y coproducción de testos orales, y mediación, asina como los exercicios del bloque escritu, xunto colos audios del de comprensión de testos orales, del B2 del añu pasáu.

Entovía nun se conoz el llugar onde va tener llugar el bloque escritu –producción y coproducción de testos escritos, comprensión de testos orales y comprensión de testos escritos–, pero yá ta determináu’l centru que va acoyer les dos pruebes del oral –producción y coproducción de testos orales y mediación– a partir del 18 d’ochobre. Ye l’IES Alfonso II d'Uviéu, que sustitúi al IES Aramo.