L’enrame de fontes centra les tradiciones d’otru San Xuan ensin fogueres

Asturies vive’l so segundu San Xuan diferente por cuenta l'andanciu. Nun van entamase fogueres multitudinaries y el fueu va quedar pa celebraciones familiares, pero sí se potencia l’engalanamientu de fontes, otra tradición venceyada a esta nueche máxica.

Nin conceyos nin coleutivos vecinales y asociaciones entamen fogueres esti añu, al igual qu’asocedió’l pasáu. La razón ye evitar grandes axuntamientos de xente nun momentu nel que la pandemia entá nun ta controlada magar l’avance de la campaña de vacunación.

Sicasí, les tradiciones de San Xuan van caltenese. El fueu nun va faltar esta nueche, anque arrequexáu a celebraciones familiares, y son munchos los llugares nos que se potencia l’enrame de fontes, como Xixón, Corvera o Bimenes.

Y ye que l’agua y el fueu son dos elementos claves nes celebraciones del solsticiu de branu, que realmente foi nel pasu del día 20 al 21, pero la Ilesia católica treslladóles, como tantes otres tradiciones paganes, pa coincidir con San Xuan Bautista. De raigañu celta, recibía’l nome d’Alban Heruin y nella faise cultu al sol col prendíu de fogueres y al agua al traviés del engalanamientu de fontes.

En delles zones, como Asturies, ta entovía mui vivu esta folixa, únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Actividaes pa güei

Mieres, que ta celebrando les fiestes de San Xuan baxo’l lema ‘Tovía nun ye San Xuan’, que xuega col del añu pasáu, ‘Esto nun ye San Xuan’, entama nel Parque Xovellanos, a les 22.30 hores con entrada llibre y aforu llendáu, un espectáculu de baille tradicional teatralizáu con Carlos Alba y los grupos folclóricos Prau Llerón, L’Artusu y Ruxidera. Les distintes tradiciones, lliturxes y lleendes al rodiu la Nueche de San Xuan sirven como filo conductor del mesmu, que va contar con una foguera simbólica representada por una llámpara.

Xixón potencia un añu más l’engalanamientu de fontes, que se lleva a los barrios y parroquies al traviés de grupos folclóricos. Entamáronse ayeri en delles zones d’agua y güei, a les 20 hores, van siguir con Andecha de Cultura Tradicional Na Señardá na fonte de Pelayo; Trebeyu nel Llavaderu de Deva; Coros y Danzas del Real Grupo de Cultura Covadonga nel parque de La Guía; Jovellanos en Los Campinos; La Alegría en La Pipa; Flor de Xaranzaina nel parque Viesca de Munieḷḷos; Excesior en Llantones; El Turruxón en Trubia; y la Banda Gaites Villa de Xixón na sablera de L’Arbeyal, mentes qu’a les 20.30 hores Xolgoriu va cumplir cola tradición nel parque Vicente Ferrer de Montevil.

La foguera en Xixón, mentes, va ser virtual. Nesti enllaz hai un contador que marca’l tiempu que queda pa la medianueche, cuando se va activar la quema y va entamase la Danza Prima nesta web diseñada pa dispositivos móviles.

Tamién Uviéu apúntase a la virtualidá, anque nel so casu va ser un espectáculu audiovisual proyeutáu na plaza de la Casa Conceyu en trés pases: 23, 23.30 y 00 hores. Enantes va haber xuegos tradicionales y actuaciones de Xeitu y la Banda de Gaites La Laguna del Torullu a les 19 hores na plaza de la Catedral.

Otres celebraciones importantes, como la de Tresona, tampoco va contar con foguera, con un potenciamientu tamién del enrame de fontes per tou Corvera, ente otres actividaes culturales.

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.

Na semeya, la xixonesa fonte de Pelayo engalanada pa otru San Xuan.