Rexistráronse 51 contaxos diarios de media la selmana pasada

Na fin de selmana finó un home de 66 años.

A falta de la espublización de los datos oficiales de la COVID-19, la Conseyería de Salú comunicó 151 contaxos esta fin de selmana –l'actualización resta 1 por un duplicáu–: 53 el vienres y el sábadu, y 45 ayeri. A lo llargo de los 7 díes algamáronse los 354 casos nuevos, pasando de 53.121 a 54.475, una media de 51 diarios.

Esta cantidá ye dalgo inferior a la de la selmana anterior, cuando foi de 55, y asemeyada a la del mes últimu. Dende que finó l'estáu d'alarma muévese ente los 49 y 55.

La evolución d'esti datu na tercer fola ye la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50 y 55, hasta los 51 actuales.

Tasa de positividá al rodiu del 3 por cientu

La tasa de positividá diaria ayeri foi del 3,47 por cientu al facese un total de 1.728 pruebes de diagnósticu d'infeición activa. A 7 díes esti porcentaxe'l sábadu yera del 2,86 por cientu –ayeri xubió al 2,89 por cientu–, superior a la del xueves, cuando taba nun 2,77 por cientu.

Un home de 66 años finó'l sábadu cola enfermedá causada pol coronavirus SARS-CoV-2, lo qu'aumenta'l total del andanciu a 1.977. Ye la sétima muerte del mes.

Hai 54 pacientes hospitalizados con confirmación o sospecha de COVID-19, mesma cantidá que'l xueves, a los qu'hai que sumar 17 que tán na UCI, 2 menos qu'esa xornada.

Na imaxe, el presidente Adrián Barbón recibe la primer dosis de la vacuna esta mañana nel recintu ferial de La Pola Llaviana. Semeya obra d'Armando Álvarez.