Quinta muerte por COVID-19 en xunu tres diez díes ensin finaos

La media diaria de contaxos de la selmana pasada foi de 55, mentes qu'esti martes rexistráronse 48 casos nuevos de coronavirus.

La perda d'un home de 79 años cola COVID-19 convirtióse na quinta del mes, terminando con un periodu de diez díes siguíos ensin tener que llamentar muertes n'Asturies. Del 23 de mayu al 2 de xunu yá s'enllazaren diez xornaes ensin finaos, dalgo que nun se daba dende setiembre.

La baxada de la letalidá del coronavirus SARS-CoV-2 ye una de les consecuencies de la campaña de vacunación, que yá va polos nacíos nel añu 1981. Dende qu'entamó l'andanciu, 1.975 persones perdieron la vida según lo datos oficiales.

A falta de la espublización de la última actualización d'éstos, la Conseyería de Salú informó de la detección de 48 contaxos ayeri –finalmente sumáronse 49 a la serie por un positivu non contabilizáu en díes anteriores, dexando'l total en 53.217–. Ye 1 más que'l llunes, cuando se comunicaron 47.

El Serviciu de Salú del Principáu d'Asturies (SESPA) fixo 2.741 pruebes de diagnósticu d'infeición activa, polo que la tasa de positividá s'asitió nel 2,30 por cientu, inferior a la de la xornada anterior, cuando quedó nel 2,40 por cientu con 2.419 tests realizaos. A 7 díes, esti porcentaxe yera enantes de l'actualización del 2,89 por cientu –ayeri baxó al 2,77 por cientu–.

Hai hospitalizaos 60 pacientes con confirmación o sospecha de COVID-19, a los qu'hai que sumar otros 21 que tán na UCI. Son 3 y 1 menos que'l día anterior, de manera respeutiva.

De 50 a 55

La selmana pasada rexistróse un pequeñu aumentu de contaxos, pasando d'una media diaria de 50 a 55. Arrancó con 52.739 positivos y finó con 53.121, lo que supón 382 casos nuevos polos 353 de l'anterior.

Dende qu'entamó la tercer fola la evolución d'esti datu foi asina: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51 y 50, hasta los 55 actuales.

Na semeya, persones esperen el so turnu pa vacunase esta mañana nel fondu norte d'El Molinón.