“‘Sirio’ ye un viaxe a los sentíos”, avanza Maxi Areñes

Fontoria yá tien mui avanzáu’l que va ser el so tercer álbum, el doble discu ‘Sirio’, que va ver la lluz na seronda. “Ye como una esperiencia de nave espacial, un viaxe a los sentíos”, apunta'l músicu Maxi Areñes en referencia a la suite de 71 minutos que da nome al trabayu, que se complementa con un segundu discu “más folk y movíu".

Llueu de ‘Nordés’ (2019) y 'El máxicu viaxe de Fionna de Morlay’ (2020), el 2021 nun podía avanzar ensin un CD de Fontoria, que se confirma como una de les bandes más actives de la escena asturiana. El grupu de folk-rock progresivu, formáu por Maxi Areñes, Nagore Goikolea, José Ramón 'Navia' y Pablo Pumarada, cuenta pa ‘Sirio’ cola collaboración de dellos músicos como Pablo Canalís (Senogul), l’andaluz Iván Emo-Martínez, el gaiteru Xosé Ánxel Allende, Susana Gudín (Taranus) y David Fernández, a mediu camín ente Glasgow y Asturies.

“Yera una idea que venía rondándome la cabeza dende hai munchos años. Sirio ye una estrella y el nome del perru de caza d’Orión. Ye un viaxe iniciáticu al traviés de la historia del perru; un viaxe qu’amiesta la mitoloxía clásica y l’universu; un viaxe al traviés del tiempu y del espaciu”, principia Maxi Areñes. “Ye como una esperiencia de nave espacial, un viaxe a los sentíos”, añade refiriéndose a la ‘Suite Sirio’ “de 71 minutos de llargor”, un corte instrumental únicu qu’ocupa’l discu 1, anque esiste la posibilidá de que finalmente se dividida en dos cortes.

Na rede yá se pueden sentir dalgunes píldores d’esti revolucionariu trabayu dientro de la música asturiana, onde ye difícil ver una propuesta d’esti calter, “un esperimentu mui guapu que creo que se prestaría pa facer un DVD”. La suite va tar acompañada, nel discu 2, de 50 minutos de llargor, por una serie de temes “muncho más folk”.

“Son pieces más asequibles, música de raigañu xugando cola esperimentación”, esplica Maxi Areñes, qu’añade que son un “homenaxe a la tradición de temes ingleses, irlandes, bretones, asturianes, maneses, escoceses y galeses. Un folk “movíu” que mira pal Arcu Atlánticu y la voz del artista que s’encarga tamién de la grabación nel so estudiu d’Areñes.

Los últimos remates avancen estos díes de cara a la espublización del trabayu na seronda, que va contar con un diseñu cuidáu a cargu de Maitetxu Isla. 130 minutos de música pa un viaxe a los sentíos dende'l salón de casa.