Fontoria asoleya ‘Nueche d’avientu’, villancicu col que la banda quier unviar un mensaxe de solidaridá

Con ‘El máxicu viaxe de Fionna de Morlay' fechu realidá hai bien pocu, Fontoria trabaya anguaño no que ye’l so tercer discu, que va llevar el nome de ‘Sirio’, col horizonte puestu a últimos del branu. Frutu d’esti llabor naz ‘Nueche d’avientu’, un villancicu con un mensaxe de solidaridá que la banda quier regalar al mundu.

‘Nueche d’avientu’ cuenta cómo unos músicos sofiten con tolo que pueden a una familia probe al enterase del nacimientu na casa d'un neñín. La lletra ye de Maxi Areñes, fundador y responsable de Fontoria, que tuvo la idea mientres grababa ‘El máxicu viaxe de Fionna de Morlay' a partir d’un son que yá tenía en cabeza dende’l primer discu, ‘Nordés’, asoleyáu nel 2019.

“Anque nel cantar los padres del neñu nómense Xosé y María, bien podíen llamase Xuan, Ana, Abdul, Fátima y de cualquier otra forma, teniendo en mente tantos y tantos casos de necesidá y el drama de los exiliaos”, esplica’l músicu, que s’encargó de la voz, les guitarres, la mandola, la mandulina y los cascabeles, amás de la produción. Xunto a él, Nagore Goikolea, violinista y arpista de la formación que reside n'Euskadi y que grabó la pista en Durango, y Pablo Pumarada, percusionista del grupu qu’ incorporó el bodhran, y Xosé Ramón ‘Navia’, que s’ocupó como ye vezu de la gaita y l’acordión.

Na imaxe, Navia, Pumarada, Maxi Areñes y Goikolea.