La cifra de contaxos sigue moviéndose nel mediu centenar diariu

Nel mes últimu la curva de la pandemia caltiénse en meseta. El vienres finó una muyer de 86 años cola enfermedá causada pol SARS-CoV-2.

La selmana pasada detectáronse 353 casos de COVID-19, pasando de 52.380 a 52.733 –l'actualización suma 4 más non contabilizaos en díes previos pa poner el total en 52.737–, lo que supón una media diaria de 50 contaxos. Ye una cifra mui asemeyada a la de l'anterior, cuando se rexistraron 51, con 358 positivos, y a la del mes últimu.

Asina, dende'l periodu del 3 al 9 de mayu, previu a l'apertura del estáu d'alarma, esti datu asitióse en 52, pa siguir nes siguientes con 49 y 53. Na tercer fola la evolución completa ye la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53 y 51, hasta los 50 actuales.

La curva, depués de pasar por un estáu de meseta y vivir llueu una pequeña baxada, tornó a un mou valle, nel que se caltién, moviéndose nel mediu centenar de contaxos diariu de media.

Menos positivos esta fin de selmana

Esta fin de selmana la Conseyería de Salú comunicó 130 contaxos, polos 167 de l'anterior: 44 el vienres, 33 el sábadu y 53 ayeri, xornada cuando se rexistró una tasa de positividá diaria del 3,35 por cientu. A 7 díes esti porcentaxe'l xueves taba nun 2,94 por cientu –ayeri baxó al 2,54 por cientu–.

Hebo que llamentar la muerte d'una muyer de 86 años el vienres, la 1.974 del andanciu. 77 pacientes tán hospitalizaos con confirmación o sospecha de COVID-19, a los qu'hai que sumar otros 31 que tán na UCI, 25 y 2 más que'l xueves, de manera respeutiva.

Na semeya, Autovac activu dende güei nel polígonu de L'Aguadamía, nel conceyu de Ribeseya.