La serie documental ‘L’horru’ yá ta disponible nel catálogu de Filmin

‘L’horru’, serie documental emitida en TPA nos primeros meses del añu, lleva’l nuesu patrimoniu más allá de les llendes d’Asturies. Dende’l miércoles ta disponible nel catálogu de Filmin y en xunetu va tar nel de Play Renfe, la plataforma audiovisual d'ociu de los trenes AVE.

Con cerca de 10.000 títulos, de los que namái mediu centenar son series documentales, la plataforma catalana de streaming ye una de les principales anguaño, mui bien valorada polos cinéfilos. Agora los sos suscriptores tienen a la so disposición los cinco capítulos de ‘L’horru’, que se van poder ver en calidá 4k, na que foi filmada.

Yá en xunetu va incluyise nel catálogu de Play Renfe, xestionáu por Movistar +, la plataforma d’ociu esistente nos trenes AVE. Ye la primer vegada qu’una producción asturiana fecha pa la TPA, que va tornar a emitir la serie próximamente, algama’l mercáu audiovisual estatal.

‘L’horru’ trátase d’un averamientu al horru en formatu cinematográficu, anque pensáu pa televisión, conducíu en castellanu por Jaime Santos y realizáu por Rubén M. Castellano. En cinco capítulos percuerre la historia d’Asturies al traviés d’esta construcción dende’l sieglu XVI hasta anguaño a partir d’entrevistes a espertos y propietarios, conversaciones qu’amuesen la realidá llíngüistica d’Asturies al emplegar éstos con naturalidá les trés llingües que se falen nel país.

Na imaxe, portada de 'L'horru' en Filmin, con una imaxe de Santos xunto con Ástur Paredes.