El festival DesconFiGnamientu va tener segunda edición con Felpeyu nel cartelu

La situación impide la celebración de Festival Internacional de la Gaita (FIG) nel formatu que conocemos, pero la Banda de Gaites Villaviciosa-El Gaitero va dar continuidá en setiembre a l'alternativa DesconFiGnamientu. Felpeyu, La Bonturné, Algaire, y Alberto Jambrina y Pablo Madrid, van poner el folk nel certame, que cuenta con espaciu tamién pa la canción asturiana y pal concursu de gaiteros.

DesconFIGnamientu Festival 2.0 va desendolcase del 2 al 5 de setiembre como sustitutu del FIG, con quince ediciones al llombu, a la espera d’una situación sanitaria segura. Les actividaes repiten nel Riera depués de la bona esperiencia del añu pasáu, con entrada de baldre con distribución pendiente de concretar la programación definitiva.

La organización confirmó de momento los conciertos de Felpeyu, La Bonturné, Algaire, y Alberto Jambrina y Pablo Madrid, que se van poder siguir tamién en direuto pela rede. D’igual forma va caltenese’l Certame de Canción Asturiana Xavi Solares y va entamase’l XI Concursu de Gaiteros Memorial José Huerta'l domingu 5.

No que se refier a les conferencies, l’investigador y músicu Dani García de la Cuesta va falar de ‘Músicos nel pórticu la ilesia de Santa María de la Oliva’ el sábadu 4 a les 12 hores na Casa de los Hevia, mentes que l’especialista y profesor de la Universidá d’Uviéu Pelayo Fernández va poner el taller ‘Empayueláu prácticu de la Gaita Asturiana’ el vienres 3 a les 17 hores nel Centru Cultural San Xuan de Capistrano, con un preciu de 25 euros y una llargor de 3 hores.

Na semeya, N'Arba na edición celebrada l'añu pasáu.