Preséntase n'Avilés el documental 'No se dice ye, se dice es'

El direutor Inaciu Galán va poner una charra nesti actu con motivu del Día Internacional de los Museos nel Muséu de la Historia Urbana d'Avilés.

La Estaya de la Llingua d'Avilés collabora nel entamu d'esta actividá, na que los asistentes van poder asistir a la estrena de documental 'No se dice ye, se dice es'. Producíu por Cuatro Gotes, bebe de la tesis doctoral ‘La llingua asturiana nel Franquismu’ de Galán y afonda na represión del asturianu esistente nel sistema educativu en diferentes etapes de los 40 años de dictadura al traviés de delles entrevistes.

L'actu va tener llugar a les 19 hores y p'asistir ye necesario escribir a la estayallingua@aviles.es, llamar al 985.54.55.08 o contautar al traviés del WhatsApp del númberu 634.821.613. Tres la proyeición, el direutor va poner una charra.

Esti añu'l Día Internacional de los Museos celébrase baxo'l lema 'El futuru de los museos: recuperar y volver a imaxinar', con visites guiaes al Muséu de la Historia Urbana d'Avilés esti meudía. Los asistentes al actu, amás de percorrer la esposición permanente, tamién van tener accesu a la temporal 'El socialismo asturiano en el exilio. 1937-1975'.