Estrénase la versión remocicada y en formatu cinematográficu de 'No se dice ye, se dice es'

Va celebrase nel Cine Felgueroso de Sama cola presencia del direutor Inaciu Galán y les persones que dieron testimoniu.

"Ye la versión cinematográfica definitiva del documental depués de cuasi trés años, con collaboradores nuevos y una imaxe diferente a lo que se vio per televisión", adelanta'l periodista xixonés sobre la proyeición d'esta tarde en Llangréu. Un actu que sirve tamién "pa celebrar cola xente que participó nel documental dando los sos testimonios, qu'en dalgunos casos son mui duros y demuestren tola represión llingüística organizada qu'hubo nel franquismu nes escueles".

La estrena del documental, que tien orixe na tesis doctoral ‘La llingua asturiana nel Franquismu’ de Galán, va tener llugar a les 19.30 hores con accesu con invitación, que s'ha confirmar na direición de corréu electrónicu hola@cuatrogotes.com. 'No se dice ye, se dice es. Represión llingüística na Asturies franquista' ye una coproducción de Cuatro Gotes y RTPA, y va proyeutase próximamente en más sales.

Otra manera, nel eventu'l xixonés va dar anuncia de la puesta en marcha d'un espaciu públicu de difusión de tolos casos de represión nel usu del asturianu nel franquismu y en toles époques "pa que se conozan".

Na imaxe, fotograma de la versión pa televisión estrenada en TPA n'avientu.