L'UC Ceares y el Llanera yá son equipos de Segunda RFEF

Acompañen al UP Langreo y al Marino a la categoría nueva, que pasa a ser la cuarta del fútbol estatal, mentes que Vetusta y CD Lealtad agoten les sos opciones de permanencia.

L'UC Ceares fixo historia nel añu del so 75 aniversariu al consiguir el títulu de Tercera División, lo que conlleva l'ascensu direuto a Segunda RFEF y la participación na edición próxima de la Copa. Valía-y l'empate nel Nuevu Nalón énte un L'Entregu al que namái-y sirvía la victoria nun partíu a muerte, pero los de Pablo Busto dieron primero y supieron alministrar la renta y, inclusive, anotar el segundu tantu p'allegría de los 100 aficionaos desplazaos dende Xixón (0-2).

El trunfu ciarista benefició al Llanera, que nun pudo con un EI San Martín (2-1) en forma. La derrota sólo-y daba la segunda posición al equipu entrenáu por José Luis Rodríguez nel casu de que cayera L'Entregu, lo qu'asocedió, polo que la gran fase d'ascensu que protagonizó tuvo finalmente la recompensa del ascensu y, posiblemente, plaza per segundu añu en Copa.

El Samartín quedó finalmente cuartu, llibrando asina de la primer ronda de les eliminatories d'ascensu pa la plaza que queda pa dar el saltu de categoría. Los crucies de la primer ronda –a partíu únicu nel campu del meyor clasificáu– van ser, poro, Avilés-Caudal (domingu, 12 hores) y Llanes-CD Tuilla (domingu, 18 hores).

Los de Villaviciosa, cerca del descensu

L'Unión y el Marino yeren, hasta'l momentu los otros dos equipos asturianos na nueva Segunda RFEF, que va tar compuesta por 5 grupos de 18 equipos por proximidá xeográfica, al nun poder acceder a la Primera RFEF, que sustitúi a la Segunda División B, que pasa de 80 a 40 equipos. Van tener como rivales a gallegos y cántabros.

Con Sporting B y CD Covadonga yá en Tercera RFEF, Vetusta y Lealtad caltienen opciones pa nun descender, sobre manera'l filial del Uviéu. A falta de dos xornaes pal final de Lliga, los uvieínos tán cuartos con 29 puntos y los maliayeses quintos con 24, marcando la salvación el Pontevedra 30 y el tercer puestu, con perda de categoría pal peor de los cinco grupos, el Salamanca CF, con 29.

Na semeya, el ciarista Medori avanza pela banda col balón.