La hostelería amplía'l so horariu n'interiores

Hasta les 23 hores hasta'l domingu, cuando van poder trabayar hasta la 1 col final del estáu d'alarma. El xueves hebo 66 contaxos y, per tercer xornada, nengún fináu con COVID-19.

Esta nueche los llocales d'hostelería del país van poder dar cenes tamién n'interiores. Hasta agora namái teníen permisu p'abrir hasta les 21, coles terraces funcionando hasta les 23, pero la flexibilización de les midíes por parte del Gobiernu al ameyorar la situación epidemiolóxica da más posibilidaes a los chigres.

Va ser per dos díes, yá que'l domingu, col fin del estáu d'alarma, van poder trabayar tantos esteriores como interiores hasta la 1. La razón ye la permanencia del toque de queda a les 23 hasta mañana.

Tasa de positividá diaria del 3,88 por cientu

A falta de la espublicación de los datos oficiales, la Conseyería de Salú informó de la detección de 66 casos nuevos ayeri. Son 17 más que'l miércoles, cuando se rexistraron 49.

Fixéronse 3.464 pruebes de diagnósticu d'infeición activa, polo que la tasa de positividá asitióse nel 3,38 por ciertu, superior a la xornada previa, cuando quedó nun 2,68 por cientu. A 7 díes esti porcentaxe yera enantes de l'actualización del 3,88 por cientu –ayeri baxó al 3,6 por cientu–.

Per tercer xornada nun hebo que llamentar muerte nenguna cola enfermedá causada pol coronavirus SARS-CoV-2. La cantidá total de finaos nel andanciu, poro, sigue en 1.948.

135 pacientes tán hospitalizaos con confirmación o sospecha de COVID-19, 1 más que'l miércoles, mentes que na UCI hai 1 menos, 47. En total hai 182 ingresaos.

Na semeya, una terraza na uvieína Gascona esta mañana.