La OSPA torna a ufrir n'Uviéu un Conciertu de les Lletres Asturianes

El maestru Rubén Díez va dirixir a la orquesta nel Auditoriu con un programa con pieces de Leoncio Diéguez Marcos y Guillermo Martínez.

Depués de la bona esperiencia del añu anterior, la Orquesta Sinfónica del Principáu d'Asturies (OSPA) torna a amosar el so compromisu col asturianu, presente na so actividá diaria, col entamu esta tarde d'un nuevu Conciertu de les Lletres Asturianes con motivu de la celebración de la XLII Selmana de les Lletres Asturianes. Na mesma va interpretase 'Bricial', poema sinfónicu que la OSPA encargó a Guillermo Martínez pola mor del 30 aniversariu de la orquesta, que se cumple’l 12 de mayu.

Amás, el programa tamién inclúi 'Rapsodia asturiana' y 'Don Quijote y la batalla de los rebaños', del autor lleonés residente n'Asturies Diéguez Marcos. Hai de rescamplar que 'Rapsodia asturiana' ta dedicada a Félix Ferreiro, que fora xefe del Serviciu de Política Llingüística y autor del 'Diccionariu básicu de la llingua asturiana'.

El conciertu va principiar a les 19 hores nel Auditoriu d'Uviéu y va contar cola asistencia de Berta Piñán, conseyera de Cultura, Política Llingüística y Turismu, y d'Antón García, direutor xeneral de Política Llingüística. Ye de baldre, pero ye necesario retirar entrada na web de la OSPA o nel Teatru Campoamor.

Na semeya, un ensayu de la OSPA pa la cita de güei.