71 casos nuevos de COVID-19 esti llunes, con una tasa de positividá diaria del 4,21 por cientu

Hebo que llamentar la muerte d'un home de 80 años nesta xornada tres dos ensin finaos.

A falta de la espublización de los datos oficiales de la COVID-19, la Conseyería de Salú comunicó la detección de 71 casos nuevos ayeri –l'actualización resta 2 por duplicaos–. Son 30 más que'l día anterior, cuando se rexistró la cantidá más baxa dende'l 9 de setiembre, pero ye una cifra menor que la media diaria de la selmana pasada, que foi de 84.

El Serviciu de Salú del Principáu d'Asturies (SESPA) fixo'l 2.968 pruebes de diagnósticu d'infeición activa y la tasa de positividad asitióse nel 4,21 por cientu, pol 3,26 por cientu del domingu. Esa xornada esti porcentaxe a 7 díes taba nun 4,54 por cientu –ayeri baxó a un 4,47 por cientu–.

Un home de 80 años finó ayeri cola enfermedá causada pol coronavirus SARS-CoV-2. Ye la muerte númberu 1.948 del andanciu y llega depués de dos xornaes ensin perdes.

Hai 151 pacientes hospitalizaos con confirmación o sospecha de COVID-19, 10 más que'l domingu. A ellos hai que sumar 51 que tán ingresaos na UCI, 3 menos que'l día anterior.

Na semeya, Carolina Darias nel Hospital Universitariu Central d'Asturies (HUCA), xunto col conseyeru de Salú, Pablo Ignacio Fernández Muñiz, charra ayeri con una persona qu'acudió en coche a vacunase na visita de la la ministra de Sanidá al país.