“La idea del llibru yera ver lo qu’había detrás de la figura de Nel Amaro”, rellata Xandru Fernández

La XLII Selmana de les Lletres Asturianes echó a andar en Mieres cola presentación de la obra conmemorativa ‘Pruebes d’autor. Les siete vides de Nel Amaro’, amás d’un documental y una esposición sobre’l del Quentuserrón. “La idea del llibru yera salir del marcu convencional de la biografía pa ver lo qu’había detrás de la figura de Nel Amaro”, esplicó Xandru Fernández, encargáu de coordinar toles actividaes.

L’escritor y profesor de Turón tuvo acompañáu pola conseyera de Cultura, Política Llingüística y Turismu, Berta Piñán, y pol alcalde de Mieres, Aníbal Vázquez, nel Auditoriu Teodoro Cuesta. En casa apuntó que miró pola “manera d’axuntar toles cares d’esti personaxe que ye tópicamente inabarcable”, unes pallabres que se suelen dicir al referise a dellos artistes, pero que “nesti casu nun ye una esaxeración, ye quedase curtiu”.

Rellató que’l nome de la obra conmemorativa, con referencia a les ‘siete vides de Nel Amaro’, vieno del rellatu de los 90 del autor ‘Les siete vides de Xulián Cuesta’ y de la obra teatral pa neñes y neños ‘Siete vidas tiene un gato’ d’una década depués. “Les siete vides podía aplicase a la so trayeutoria”, señaló, pa depués rescamplar que “ye un llibru coleutivu que tenía la idea de salinos del marcu convencional de la biografía pa ver lo qu’había detrás de la figura de Nel Amaro”.

Nél participen Germán Labrador, Xaime Martínez, Arantxa Margolles, Silvia Cosio, Xune Elipe, Leticia González Menéndez y José Busto, amás del propiu Fernández. El presidente Adrián Barbón escribe la presentación, onde apunta que “Asturies reconoz con esti homexe, al dedica-y la 42 Selmana de les Lletres Asturianes, que quixera comunicar la so esperiencia vital n’asturianu y nos l’apurriera fecha arte”.

Na so intervención, Fernández, bon conocedor de la so obra y amigu del artista multidisciplinar, recordó la primer vegada que vio a Amaro, “nel salón d’actos del Colexu La Salle de Turón como pregoneru de les fiestes del Cristu”, pregón que dio d’una manera tan propia, diferente a lo establecío. El llibru recueye una semeya d’esi día de 1983 y d’otres munches actividaes y espresiones artístiques del de Quentuserrón: “Foi un precedente d’una forma d’entender lo popular y lo culto d’una manera particular”, aseguró’l coordinador d’esta Selmana de les Lletres.

Pioneru

Piñán tamién tuvo’l gustu de poder conocer bien a Amaro y recordó dalgunes esperiencies col autor dende “el ciñu que da la cercanía”. Asina, rescampló la so “bondá, arrogancia y capacidá de trabayu”.

“Pioneru ye la pallabra que defide’l so compromisu. Foi ún de los primeros críticos que tuvo la lliteratura asturiana, un teóricu de la poesía, el primeru que reflexonó sobre la poesía en marcha”, siguió la conseyera, que tamién citó’l so arte postal y efímeru, ente otres práutiques que desendolcó. “La esencia de la so lliteratura yera facer lliteratura de lo que lu arrodiaba”, apuntó darréu, emponderando tamién la so capacidá de “facela llegar a toles partes”.

Pela so parte, Vázquez refirióse a Amaro como una persona “inolvidable en Mieres” y destacó “el so compromisu col asturianu”. L’actu siguió cola estrena del documental sobre la so figura producíu por Cuatro Gotes y nel que participen la so vilba Marta Baquero y Adolfo Camilo Díaz, Lourdes Álvarez, Rubén Vega, Arantxa Margolles, Ánxel Nava, Miguel Rojo y Olvido Herrero.

Esti documental, de 38 minutos de llargor, va emitise mañana a les 23.10 hores en TPA. Otra manera, tres l’actu del Teodoro Cuesta inauguróse la esposición sobre la vida y obra de Nel Amaro, que se va poder visitar na propia casa de cultura mierense hasta’l 11 de xunu de llunes a vienres de 12 a 14 y de 17 a 21 hores.

Na semeya, Fernández esplica detalles de la esposición sobre la vida y obra d'Amaro a Piñán, Vázquez y Antón García, direutor xeneral de Política Llingüística.