La vacuna de Janssen aporta’l miércoles y va destinase a les persones d’ente 70 y 79 años

Asturies va recibir esti miércoles 3.100 dosis de la vacuna de Janssen, que se va destinar a les persones d’ente 70 y 79 años, reforzando asina la campaña de vacunación con un cuartu modelu de preparáu contra la COVID-19 que sumar a la de Pfizer/BioNTech, Moderna y AstraZeneca. Na selmana última aumentó la media de contaxos diarios de 115 a 121.

“Los llugares onde se distribuyen va depender de temes loxísticos”, avanzó esta mañana Pablo Ignacio Fernández Muñiz, conseyeru de Salú. Nesti primer unvíu son 3.100 dosis, una cantidá que dirá aumentando en selmanes próximes, siendo’l mes de mayu “cuando empiece a llegar d’una manera más importante.

La de Janssen, filial belga de la estauxunidense Johnson & Johnson, a diferencia de les anteriores ye d’una sola puesta y la so conservación ye más cenciella al aguantar 3 meses a una temperatura d’ente 2 y 8 graos. Cuenta col preste de l’Axencia Europea del Medicamentu dende hai un mes y n’Asturies va destinase, al igual que la de Pfizer y Moderna, a los mayores de 70 años, en concreto a los del grupu d’eda que llega hasta los 79, según avanzó’l conseyeru.

Mentes, la d’AstraZeneca, tres los últimos cambios decidíos, ta alministrándose agora al grupu d’edá de 60 a 69 años.

3 finaos

A falta de la espublización de los datos oficiales de la COVID-19, Asturies rexistró esta fin de selmana 319 contaxos –l'actualización suma 4 con contabilizaos estos díes pa poner el total en 323–: 136 el vienres, 82 el sábadu y 101 ayeri. Les tases de positividá diaries quedaron nun 5,15 por cientu, 3,88 por cientu y 5,75 por cientu, de manera respeutiva, siendo esti porcentaxe a 7 díes el sábadu del 4,61 por cientu –ayeri xubió al 4,65 por cientu–.

La selmana principió con 47.803 casos detectaos tres una revisión de los datos –hai una selmana informábense 47.768– y ayeri sumábense 48.648 –definitivamente 48.652–. Son 845, polos 807 de l’anterior, una media de 121 contaxos diarios.

Supón un aumentu nuevu depués del descensu rexistráu nos 7 díes anteriores. Dende qu’entamó la tercer fola la evolución d’esti indicador foi’l siguiente: 78, 101, 167, 292, 421, 482, 383, 226, 154, 135, 144, 113, 113, 119, 115 y 121.

Estos trés díes últimos finaron trés persones, una cada día: el vienres un home de 59 años, el sábadu una muyer de 76 y ayeri otra de 67. Dende qu’entamó l’andanciu contabilícense 1.923 muertes cola enfermedá causada pol coronavirus SARS-CoV-2.

Hai hospitalizaos 179 pacientes con confirmación o sospecha de COVID-19, a los qu’hai que sumar otros 67 que tán na UCI. Son 28 y 2 más que’l xueves, de manera respeutiva.

Na semeya, una de les 84 vecines y vecinos de Ribeseya d'ente 70 y 79 años que recibieron esta mañana la vacuna de Pfizer.