Una terminoloxía centrada nos xuegos de rol, decimonovena propuesta de la iniciativa TermAst

La decimonovena propuesta terminolóxica de TermAst ta dedicada a los xuegos de rol. Nicolás Bardio, escritor y ideólogu del esitosu ‘Depués d’ochobre’, presenta un pallabreru formáu por más de 150 entraes con vocablos pa emplegar nel desendolcu y nel xuegu de partíes.

‘Alien’, tornáu como “alieníxena” que, al empar, ye “ser vivu d’otru planeta”, ye la primer pallabra d’una llista na que cada término, amás de con una definición, vien acompañada de la so torna al castellanu. ‘DDP (dientro del personaxe)’, ‘habilidá’, ‘matanza dafechu’, ‘partida de corte’, ‘riegles’, ‘tiraes enfrentaes’ o ‘zombi’ son dalgunes de les pallabres que Bardio propón na 'Términos de xuegos de rol' a la hora de crear o prauticar n’asturianu esti tipu d’actividá con tantu puxu ente xente mozo y non tan mozo.

L’oxetivu de TermAst ye recoyer iniciatives individuales o grupales de propuestes terminolóxiques por persones en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu será l’Academia de la Llingua Asturiana (ALLA), entamadora d’esta iniciativa xunto con Softastur y el Colexu d’Inxenieros n’Informática del Principáu d’Asturies, la que dirá inxiriéndolos dientro de los sos calces normativos.