La tasa d'aprobaos del B2 quedó nun 62 por cientu

208 persones tienen el nivel intermediu de capacitación oficial d'asturianu y van poder aspirar al avanzáu C1 n'ochobre d'esti añu.

El Boletín Oficial del Principáu d'Asturies (BOPA) asoleyó güei la convocatoria de les pruebes de certificación de Llingua Asturiana adaptaes al Marcu Común Européu de Referencia pa les Llingües pa esti cursu escolar. Van ser en total dos pruebes: la segunda del intermediu B2 y la primera del avanzáu C1, con 300 places caúna

El cursu pasáu fíxose la primera, de B2, con cuasi 800 aspirantes pa un cupu máximu de 500. El númberu final d'almitíos pa la prueba de mayu quedó en 407, que'l retrasu a ochobre provocáu pola pandemia de COVID-19 reduxo finalmente a 335 presentaos, lo que representa un 82,31 por cientu, ensin posiblidá pa los 300 que quedaran previamente fuera por sortéu.

Finalmente un total de 208 persones algamaron la calificación d'aptes y algamaron el nivel B2, lo que supón un 61,79 por cientu d'aprobaos. La Comisión Permanente Educación-Cultura decidió pa esti añu dar continuidá a éstos por si quieren optar al C1, el más altu de los afitaos pol Gobiernu nel decretu qu'afita los niveles de competencia adaptaos al al Marcu Común Européu de Referencia pa les Llingües, y ufrir la oportunidá a los que nun pudieron esaminase l'añu pasáu del B2 a presentase a ésti o, nel casu de tener capacidá, al C1.

Les matrícules van poder formalizase del 5 al 16 d'abril nos institutos Aramo d’Uviéu, Calderón de la Barca de Xixón, Carreño Miranda d’Avilés y Bernaldo de Quirós de Mieres. L'esame va tener llugar el sábadu 9 d'ochobre –el bloque escritu–, coles pruebes orales a partir del 18.