Asturies acumula dos xornaes con cifres de contaxos asemeyaes a les d'enantes de Navidá

La media de positivos diarios la selmana pasada caltiénse na mesma cantidá que l'anterior: 113.

Asturies rexistró nos dos díes últimos 65 y 61 contaxos, cifres asemeyaes a les d'enantes de Navidá. En concreto, ye la xornada con menos casos nuevos dende'l 26 d'avientu, cuando se rexistraron 56 –que xubieron a 57 tres una revisión de los datos–, en plenes fiestes navidiegues, momentu nel que camudó la tendencia dando pie a la tercer fola de la pandemia de COVID-19.

El total de casos de la fin de selmana ascendió a 266 polos 350 de l'anterior. El vienres la cantidá de positivos quedó en 140, con una tasa de positividá del 6,08 por cientu, mentes que'l sábadu asitióse en 4.50 y ayeri en 4,75.

A 7 díes, el sábadu esti porcentaxe yera del 5,43 por cientu –ayeri baxó al 5,16 por cientu–, mui asemeyada a la del xueves, cuando taba nun 5,66 por cientu, anque se fraya la tendencia ascendente de les xornaes últimes. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

La selmana principió con 45.366 casos –tres la revisión de datos –dende qu'entamó l'andanciu, pasando ayeri esti total a 46.155 –l'actualización rexistra ún menos por duplicaos en díes previos que pon el total en 46.154–. Son un total de 792 positivos, 2 más que l'anterior, lo que signifiquen tamién 113 diarios de media. La evolución nesta tercer fola ye la siguiente: 78, 101, 167, 292, 421, 482, 383, 226, 154, 135, 144, 113 y los actuales 113.

7 finaos

Nestos trés díes hebo que llamentar 7 finaos, 4 muyeres y 3 homes: 4 el vienres, 2 el sábadu y 1 el domingu. Dende la llegada del coronavirus SARS-CoV-2 morrieron n'Asturies 1.870 persones –los datos oficiales sumaron de sópitu 32 non contabilizaos de xornaes pasaes–.

Hai hospitalizaos 225 pacientes con confirmación o sospecha de COVID-19, 16 más que'l xueves. Mentes, 81 tán ingresaos na UCI, 7 menos.