144 contaxos esti martes, con una tasa de positividá del 4,54 por cientu

Acumúlense yá cuatro selmanes ensin biltos en residencies de mayores, onde namái se contabilizaron dos positivos de COVID-19.

A falta de la espublización de los datos oficiales de la COVID-19, la Conseyería de Salú informó de 144 contaxos ayeri –l'actualización suma ún positivu más non contabilizáu'l llunes, que pon el total en 145–. Son 35 más que'l día anterior nuna xornada na que se fixeron cuasi mil pruebes de diagnósticu d'infeición activa más (4.031 por 3.190 del llunes), polo que la tasa de positividá diaria baxó a un 4,54 por cientu (5,05 por cientu nel previu).

A 7 díes, esti porcentaxe'l llunes yera del 5,04 por cientu –ayeri xubió al 5,23 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Hai que llamentar la muerte de 4 persones ayeri, trés homes de 92, 68 y 66 años, y una muyer de 86. Dende qu'entamó l'andanciu finaron cola cola enfermedá causada pol coronavirus SARS-CoV-2 un total de 1.827 asturianes y asturianos –sumáronse a la serie dos finaos non contabilizaos en feches anteriores–.

211 pacientes tán hospitalizaos con confirmación o sospecha de COVID-19, a los qu'hai que sumar 87 ingresaos na UCI. Son 7 y 4 menos que'l llunes, de manera respeutiva.

Efeutos de la vacunación

Salú nun detectó nes residencias de persones mayores biltos de coronavirus, lo qu'implica más de trés casos, per cuarta selmana siguida. En concreto, del 9 al 15 de marzu rexistráronse 2 positivos n'otros tantos centros sociosanitarios de los 270 qu'esisten n'Asturies, onde toles persones que quixeron recibieron la vacuna, asina como 8 finaos con domiciliu nellos cuando nel periodu anterior morrieron 10.