“Sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes”, diz Esther García

Adolfo Camilo Díaz, Aida Escudero y José Ángel Gayol recibieron la escultura Apolo de los XX Premios de la Crítica y XV de les Lletres d’Asturies nes estayes d’asturianu. “Sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes”, apuntó María Esther García López nun actu nel que rector Ignacio Villaverde dixo les sos primeres pallabres en llingua asturiana.

La conseyera de Cultura, Política Llingüística y Turismu, Berta Piñán, presidió xunto a ellos un eventu que taba programáu pa xineru, pero que se tuvo qu’aplazar pola situación sanitaria del momentu. Ente’l públicu, el secretariu de l’Academia de la Llingua Asturiana, Xosé Ramón Iglesias Cueva y les alcaldeses de Candás y Castrillón, Amelia Fernández López y Yasmina Triguero, de manera respeutiva, ente otres autoridaes.

García, presidenta de l’Asociación d’Escritores d’Asturies, entidá entamadora de los gallardones, protagonizó’l primer discursu, n’asturianu dafechu, qu’entamó dando les gracies a los presentes “por tar equí reconociendo’l valir de la lliteratura asturiana tanto en castellán como n’asturianu”. Darréu recordó a “los escritores que nos dexaron esti añu”, citando a Luis Sepúlveda, Luis Arias Argüelles-Meres, Marián Suárez y Blanca Álvarez, amás d’a Jaime Herrero, sociu fundador del coleutivu y autor de les escultures Apolo que sirven de premiu.

“Güei –pol vienres– sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes, tan bonos como n’otros llugares; tan distinguíos tanto en castellán como en castellanu”, afirmó García tres analizar el llabor de l’Asociación d’Escritores d’Asturies del 2020, añu nel qu’estrenó sede en Candás, y anunciar un proyeutu de llibru-discu cola participación de 45 autores y 21 cantautores asturianos pa recaudar fondos pa la Fundación Banco de Alimentos de Asturias.

Los premiaos

La escritora Carolina Sarmiento lleó les actes de los xuraos de los diferentes premios correspondientes a los meyores títulos del 2019. El de narrativa n’asturianu foi pa Gayol pa ‘En primera persona’ (Trabe), qu’emponderó estos gallardones, “una iniciativa bien guapa”.

“Esti ye un premiu especial, ún al que nun se presenta l’autor”, señaló, “un regalu del azur, pero quiero pensar que dalgo de trabayu habrá nel llibru que merez el premiu. Que siendo en primera persona, quería falar en segunda, tercera…, y a cuantes persones sía posible, qu’esa ye la vocación d’un llibru escritu na llingua na que tea escritu. Pocos llibros me dieron y tán dándome tantes satisfaiciones como ésti y nunca creyí que lo que pudiera dicir yo del mundu tuviera tanto interés pa los demás”. “Esti premiu anima a siguir escribiendo y describiendo”, finó.

Escudero llevó’l de poesía n’asturianu por ‘Esti llugar qu’agora ye nuesu. Poemariu neanderthal’ (Trabe), “d’una temática un poco inusual dientro de la lliteratura”, afirmó. Na so interveción, emocionada, centróse en dar agradecimientos a familiares y persones cercanes.

El más elocuente de la tarde foi Adolfo Camilo, premiu a la Meyor Columna Periodística na estaya d’asturianu, que, amás de dar les gracies, fixo “un minutu de reflexón creativa” na que tuvo presencia la reina d’Inglaterra, Marta Mencía ‘Lola’ del programa de televisión ‘La isla de las tentaciones’ y Isabel Díaz Ayuso. Tamién un artículu de ‘El Faro de Cádiz’ sobre una de les consecuencies de la COVID-19 ente homes de más de 60 años que foi noticia la selmana pasada.

El restu de premiaos foron Juan Ignacio González, ganador de poesía en castellanu por ‘Los Jardines en Ruinas’ (Bajamar); Carmen Cabeza, de narrativa nesta llingua por 'Nadie somos Ingrid Bergman' (Nieva); y Joaquín Fuertes, como columnista. Mentes el XV Premiu de les Lletres n’Asturies, como recocimientu a una trayeutoria, foi pa Carmen Ruiz-Tilve, presente nel actu, anque tomó la pallabra por ella la so fía.

Intervenciones n’asturianu

Piñán tamién emplegó l’asturianu nel so discursu, nel qu’insistió nel compromisu del Gobiernu y la so conseyería pa cola Universidá d’Uviéu, aprovechando la presencia nel Aula Magna del Edificiu Históricu, na primer ocasión que coincidía col rector nuevu na institución, y pa cola cultura asturiana. “La lliteratura asturiana necesita del apoyu imprescindible de les instituciones pa ser difundida, pa que les y los artistes puedan profesionalizase y desarrollar esi inmensu talentu qu’arriquez el nuesu patrimoniu cultural”, apuntó la tamién escritora, que nun quixo escaecer el llabor del sector del llibru.

“Queremos dar apoyu a la cultura asturiana y pa ello debemos cuntar coles persones que la faen, escuchar les sos necesidaes, les propuestes y esperiencies que nos aporten, pa implementar toles aiciones que tean al nuesu alcance de la mano del sector”, siguió Piñán. “El bien de la nuesa cultura, el bien de la nuesa lliteratura, ye’l bien de los asturianos y asturianes” finó.

Zarró l’actu Villaverde, que s’encargó de conducilu, emplegando per primer vegada la llingua asturiana nuna intervención pública como rector. Asina, nun cachu del entamu del so discursu rescampló que “ye mui prestoso pa min que nos atopemos güei nuna de les sales emblemátiques de la Universidá d’Uviéu pa poner en valor lo que ye propio a la so naturaleza, les lletres, les palabres escrites; lo que ye lo mesmo, la espresión de les idees. Con facer reconocencia pública y na Universidá a les persones que lo faen, en castellán o n’asturianu, a les sos aportaciones, a les sos trayeutories”.

Pa finar, lleó un testu espublizáu nel 1976 pol profesor José Benito Álvarez-Buylla al traviés del Seminariu de Llingua Asturiana de la Universidá d’Uviéu, el conocíu ‘Himnu de la xuventú d’Asturies’ que fixo popular el grupu Nuberu.

Na semeya superior, Villaverde, Piñán y García, de pie a la izquierda, xunto colos premiaos: Escudero, Adolfo Camilo, González, Gayol, Cabeza y Fuertes, con Ruiz-Tilve sentada. Abaxo, la escritora fala cola presidenta de l'Asociación d'Escritores d'Asturies.