“Hai qu’abrir cuanto primero esi alderique imprescindible, calmáu y asosegáu sobre la reforma estatutaria”, demanda Llera

Iniciativa pol Asturianu foi ún de los diez coleutivos que formen la Plataforma Igualdá Llingüística responsable de la PNL sobre la Realidá Plurillingüe y Igualdá Llingüística qu’incluyía un puntu sobre la oficialidá qu’algamó’l preste del Congresu. El so presidente Iván Llera, que participó nes negociaciones en Madrid, llama a "abrir cuanto primero” l’alderique n’Asturies sobre la reforma del Estatutu.

“L’aprobación ye una mui bona noticia. Foron díes d’un trabayu mui intensu nel Congresu y, anque sía dalgo simbólico, ye un avance mui importante, sobre manera de cara a la sociedá, pa qu’empiece a ver la oficialidá como dalgo normal, como una cuestión de derechos”, espresó Llera ayeri de vuelta pa Xixón xunto a Xuan Pandiella, representantes d’Iniciativa pol Asturianu desplazaos a Castilla. Agora considera necesario “abrir cuanto primero esi alderique imprescindible, calmáu y asosegáu sobre la reforma estatutaria” n’Asturies.

El deséu ye contar “cola mayoría de los partíos políticos pa llograr esi mesmu consensu na Xunta Xeneral. Queremos sumar y llograr una mayoría de votos afirmativos a favor de la oficialidá incluyendo a partíos de diferentes sensibilidaes y de tol arcu parlamentariu asturianu. Ye un pasu importante que les Cortes sofiten y seyan conscientes de la realidá llingüística d'Asturies, onde la sociedá quier vivir n'asturianu con normalidá constitucional y nun clima d'harmonía coles diferentes llingües que se falen n'Asturies".

Na semeya, xunta de trabayu en Madrid de los coleutivos proponentes de la PNL hores enantes de la so presentación, con Llera en primer plano a la izquierda con xerséi rayáu.