El Conseyu de Ministros da'l preste al rescate estatal a Duro Felguera

Va recibir una ayuda de 120 millones "pol so calter d'empresa estratéxica, sobre manera pa la economía asturiana", apuntó Montero.

El Gobiernu estatal sal al rescate de Duro Felguera al traviés del Fondu d'Apoyu a la Solvencia d'Empreses Estratéxiques, que xestiona la Sociedá Estatal de Participaciones Industriales (SEPI), creáu en xunetu pa reforciar la solvencia de firmes afeutaes pola pandemia con 10.000 millones d'euros. La histórica compañía ye la segunda qu'accede a esta ferramienta d'apoyu tres Air Europa, que recibió en payares a 475 millones, tres el preste esta mañana del Conseyu de Ministros xunto a otra aportación a Plus Ultra.

"L'importe total de l'ayuda algama los 120 millones d'euros. Una ayuda que se concreta nun préstamu participativu de 70 millones, un préstamu ordinariu de 20 millones y una aportación de capital, o nel so casu de préstamu participativu, de 30 millones", esplicó la ministra de Facienda y vocera del Executivu, María Jesús Montero. Ente les condiciones p'acceder a estes ayudes ta "la reestructuración de la deuda que tien pendiente y que se contempla nel so plan de viabilidá, y la incorporación na so compañía de dos conseyeros delegados designaos pol Conseyu Xestor".

"Duro Felguera va recibir esta ayuda pola so calter d'empresa estratéxica, sobre manera pa la economía asturiana", siguió l'andaluza, que cifró el so pesu nun "1,18 por cientu del valor añadíu brutu" d'Asturies y un "1 por cientu del total del emplegu" según los datos del 2019. Otra manera, les ayudes a les llinies aérees Plus Ultra van ser de 53 millones d'euros, con un préstamu participativu de 34 y otru ordinariu de 19.

6 millones del Gobiernu d'Asturies

La empresa tamién va contar con una participación del Gobiernu d'Asturies, que va poner 6 millones d'euros pal so saniamientu y reestructuración financiera. Asina lo aprobó'l vienres pasáu'l Conseyu de Gobiernu, atendiendo a un requerimientu de la SEPI pa dar confianza al rescate.

Na semeya, llar de Duro Felguera, asitiáu en Xixón. Semeya propiedá de Duro Felguera.