Iniciativa pol Asturianu reclama a los candidatos a rector un billingüismu real na Universidá d’Uviéu

El día 12 celébrense les eleiciones al Rectoráu de la Universidá d’Uviéu y Iniciativa pol Asturianu reclama a los dos candidatos “compromisos” pa col idioma. Ente les demandes ta la esistencia d’un billingüismu real que nun impida a alumnos facer tesis o TFG n’asturianu, la puesta en marcha de la oficina de normalización o la creación d’un grau de Llingua Asturiana y otru de Periodismu.

La organización quier que Santiago García Granda y Ignacio Villaverde s'involucren pa “peracabar coles situaciones de discriminación llingüística na universidá asturiana”. Asina demanden un compromisu pa un billingüismu real pa que “se puedan presentar tesis y Trabayos Fin de Grau (TFG) n'asturianu, en plena igualdá de condiciones coles demás llingües; que los trabayos n'asturianu puedan optar a premios; y que s'establezan categoríes diferentes pal premiu lliterariu”.

Tamién ve clave “la puesta en marcha d'una oficina de normalización con personal propiu dientro del organismu universitariu, tal y como ta previsto y s'alcordó en payares de 2019 cola Dirección Xeneral de Política Llingüística”. La visibilización de la llingua asturiana, llevándola a la cartelería de los sos edificios y a les redes sociales, ye otru de los aspeutos a ameyorar por parte de la institución, según apunta esti coleutivu, que solicita d’igual forma la creación d’un grau de Llingua Asturiana y otru de Periodismu que s'imparta n'asturianu.

“Con estes propuestes, Iniciativa pol Asturianu quier que la Universidá d'Uviéu se convierta nun referente de la normalización llingüística y ponga fin a la discriminación que sufren los estudiantes que quieren usar l'asturianu nesta etapa académica. A mediaos d’ochobre del añu pasáu, la organización denunció que Raúl Alonso, un estudiante del grau d’Historia que decidió escoyer l’asturianu como llingua pa entregar y defender el so TFG, nun pudo facelo porque dende l’alministración de la institución universitaria se-y negó esi derechu”, recuerda al tiempu qu’esixe que “el casu de Raúl seya l’ultimu casu de discriminación llingüística”.

Na semeya, detalle de la fachada del Edificiu Históricu de la Universidá d'Uviéu.