Canal refuga posicionase sobre la propuesta pa dar el nome d'Enriqueta González Rubín a la Casa Cultura

L’alcalde de Ribeseya, Ramón Manuel Canal, refugó posicionase sobre la propuesta de Pueblu pa dar el nome d’Enriqueta González Rubín a la Casa de Cultura de la villa n’homenaxe a la escritora. El socialista ve falta de consensu y retrasa’l posicionamientu del so partíu a la Comisión que se va crear pa tratar l’encamientu.

La candidatura de xunidá popular llevó al Plenu telemáticu d’ayeri l’asuntu, “criticando les declaraciones del PP y del restu de partíos”, resumió Ricardo Pedro Cangas la so intervención. “Nótase munchu cuando fala de dalgo que sabe o fala de dalgo que nun sabe”, dixo l’edil na so intervención refiriéndose al popular Paulo García Díaz, al que convidó “a revisar los méritos d’esta muyer pa tener esi reconocimientu”.

“Insisto na opinión de Lorenzo Cordero (cronista oficial de Ribeseya), que yo creo que d’esto sabe más de los que tamos equí sentaos y espero que cuando se cree la Comisión reconsideréis la postura y que lleguemos a una entente”, añadió. Nengún de los presentes entró al alderique nin se posicionó.

Sí hebo declaraciones, previes a la celebración del Plenu, del alcalde a la emisora llocal Cope Ribadesella. Canal apuntó que ye un tema que se tien que tratar na Comisión que se cree al respeuto “y dialogar”.

“Yo, de toes formes, lo que veo ye que nun ye dalgo que tenga unanimidá. Tendremos qu’analizalo de forma detenida y ver lo qu’al final se decida”, añadió, pa finar afirmando que “si nun ye posible esta propuesta, que sía otra con más consensu”. De momento paez que Ciudadanos va optar pola astención, mentes que Foro y el PP entovía nun avanzaron cuál sería'l so votu, que taríen ente l'astención y el non.

No que respeuta a la cai que prometió nel 2019 pa l’autora de la primer novela conocida escrita n’asturianu, ‘Viaxe del Tíu Pacho el Sordu a Uviedo’ (1875), apuntó qu’entá nun se fixo pola ausencia de víes nueves na villa, “porque quitar el nome d’una cai pa poner otru ye complicao”.

Calca nesti enllaz pa siguir el Plenu d'ayeri (intervención de Cangas nel minutu 37.52).

Na imaxe, Cangas apaez na ventana asitiada nel mediu a la derecha, mentes que Canal ta al otru estremu na mesma llinia.